Old Trafford-ah Pep-a'n City a hruai lut dawn

Manchester United leh Manchester City te inkarah point riat a awm mek a, match 15 chiah khelh a la nih avangin Premier League nomawi chawi tur a la chiang lo. Pathianni zan dar 7:30 hian Old Trafford-ah Manchester derby khelh a ni dawn; Jose Mourinho nge Pep Guardiola dingchang zawk dawn tih chu khawvel hmuh chak a ni.

Man United hian tun season chhungin an khelmualah hian inelna hrang hrangah match 11 khel tawhin hnehna an chang vek a, City hi an hneh a nih chuan Old Trafford-ah match 41 chhung an tlawm dawn lo tihna a ni–club record thar a ni bawk ang.

Mourinho naute hian inrintawkna nen mikhual an dawngsawng dawn, chutihrualin an mikhual tur City lakah an fimkhur a ngai dawn. Guardiola kaihhruai City hian tun season league match bikah hneh loh an la tawng lo a, an khingpui vawi khat an draw tih mai loh chu hnehna an chang fai vek.

Pogba tel loin

Manchester United midfielder Paul Pogba chu Arsenal an hneh ṭuma hnawhchhuah a nih avangin match thum khel thei lo tura hrem a ni a, zaninah hremna a hmang ṭan ang. France international Pogba awm lo tur hi United tan channa lian tak a ni thei.

Jose Mourinho-a'n Chelsea a enkawl lai aṭanga a hman thiam tawh Nemanja Matic chuan City a hmachhawn tur thu a sawi tawh a, Belgium international Marouane Fellaini hliam a dam tawh bawk avangin midfield laiah tharum hmangin City danchah an tumin a rinawm–thahrui ngah dang Ander Herrera an la nei bawk.

United manager hian Eric Bailly leh Michael Carrick te an la inkhelh theih loh tur thu a sawi a, Phil Jones erawh a inpeih thung. United hian tun hnai an match hnuhnung pathuma Watford, Arsenal leh CSKA Moscow te an hneh ṭumin tlarhnungah player pathum an tlar, City dang tur hian Victor Lindelof, Chris Smalling leh Daley Blind bakah Marcos Rojo te chu chhawr theih turin an inpeih.

Romelu Lukaku-a'n CSKA Moscow lakah goal a khung leh tawh a, United ṭantute tan thawk huaina tham a tling ang. Everton striker Lukaku-a'n goal a neih hlehtheih loh laia United lawmna siamtu chu Jesse Lingard a ni. Lingard hian Watford leh Arsenal lakah goal pawimawh a khung.

United academy aṭanga inzir chhuak winger hi season kal laiah goal ruk a khung tawh, Champions League lamah hahchawlhtir a nih avangin City a hmachhawn tura ngaih a ni. Zlatan Ibrahimovic-a'n goal a la khung lo a, chuti chuang chuan Swede striker Ibra hi inkhel boruak sang tam tak paltlang tawh a nih avangin bench aṭanga lut tur chuan ani aia thlanawm an tam chuang lo.

Goal 62 zet

Barcelona leh Bayern Munich a enkawl laia attacking game khel thiam hmingthang Pep Guardiola-a'n a duhdan takin City a khelhtir thei tawh a, tun season inelna hrang hrangah goal 62 zet an khung tawh a, an match tinah goal thum deuh thaw zel khung anga chhut theih an ni.

Champions League-ah City hi chak lo hlim an ni a, zaninah chak an duh dawn. Shakhtar Donetsk lakah City hian an player neih ṭhat ber an thawhchhuah pui lo. Kartawpa league match-a West Ham hnehtu player pasarih ngawt siksawi an ni, midfielder pawimawh Kevin De Bruyne awltir a ni a–Fernandinho, Leroy Sane leh Sergio Aguero te pawh bench lamah ṭhuttir an ni bawk.

Pep-a'n striker pakhat a hmang tlangpui a, Sergio Aguero chu first choice niin Gabriel Jesus nen an inluhchhawk fo bawk. Brazil international Jesus hian Champions League-ah inkhel bul ṭanin a khel tluan a, United lakah Aguero zawkin bul a ṭan ve leh thung tura ngaih a ni. Striker maltlat thlawp tur hian khelmual sira awm Raheem Sterling leh Leroy Sane te chu goal nawr kawnga thahrui pawimawh an ni ṭhin bawk.

Manchester City hian inelna hrang hrangah match 23 khel tawhin Wolves lakah (League Cup) chiah goal khung loh an nei, goal 62 an khung zinga 29-ah te hian Sterling leh Sane an inrawlh, England leh Germany international te pahnih hi United tana ven ngun ngai bik tur an ni.

David Silva leh Vincent Kompany te hliam vangin an dinhmun a la chiang lo a, captain Kompany hi chhawr rim tak a nih loh avangin a awm loh a langsar lo ang. Mahse, midfielder Silva awm lo tur hi City tan channa lian tak a ni thei. Spain international hi City inkhel khaikhawmtu a nih bakah khelmual chhungah an hotupa a ni a, ani a awm lo a nih chuan De Bruyne mawhphurhna a sang zual ang.