Merseyside derby Big Sam-a tan Fab Four hmaah fiahna
Team talbuai Everton-in an talbuaina lak aṭanga chhanhim turin Sam Allardyce an lalut a, English manager hian a match hmasa berah Huddersfield Town hmachhawnin Everton hi 2-0 in hnehna a chanpui nghal.
Ningani zanah Everton-in beisei an neih tawh lohna Europa League-ah hnehna changin Apollon Limassol chu 3-0 in an sawp bawk a, he inkhelah erawh mimal thil avangin Big Sam a zin ve lo. Zanin dar 7:45-ah Everton hian Liverpool an lenchilh dawn a, Big Sam-a'n Merseyside derby-ah fiahna hautak a hmachhawn nghal dawn.
The Fab Four
Liverpool-in tlarhmaah Philippe Coutinho, Sadio Mane, Roberto Firmino leh Mohamed Salah an nei a, tlarhmaa player pali hi an thiam em avangin 'Tha Fabulous Four' tia hming lem pek an ni–Spartak Moscow laka goal sarih khung hlim player pali hi zaninah an inlan a nih chuan Everton tlarhnung tan dan an chakawm dawn lo.
Fab Four zinga player langsar bera chhal ngam chu Salah a ni a, Egyptian winger hian Reds tan tun season-ah goal 18 khungin assist pali a nei tawh! Roberto Firmino-a'n a phu angin fak hlawh tawk ṭhin lo mah se goal 12 khungin assist pali a nei tawh a, Spartak laka hattrick siamtu Coutinho-a'n goal kua khunga assist vawi ruk a neih tawh laiin Sadio Mane chuan goal sarih khungin assist pali a nei bawk–khawvela eng team tlarhnung pawhin anni pali dan hi an chak lo ang.
Klopp vs Big Sam
Football manager zingah ṭawngkam hriam tak tak hmanga inbeihna a thleng fo a, inkhelh hma leh inkhelh zawh hnu thlengin he boruak hi hriat tur a lo awm tawh ṭhin–zanina intawng tur manager pahnih pawh hian Big Sam-a'n Sunderland a enkawl laiin buaina an lo nei tawh a, Jurgen Klopp-a'n an inkar boruak a ṭhat tawh thu sawi mah se zanin an inkhel tur boruak a nep phah lo ang.
Klopp chuan, "Sam nen hian thawnthu hlui kan nei ngei a, mah se khatihlai kha chuan Sunderland manager a ni. Mahse, England manager a nih hnuah khan hun rei lote mah nise kan inkar boruak a ṭha em em a, buaina a awm tawh lo. Everton a enkawl thei hi ka lawmpui a, Liverpool khaw club an nih avangin Everton hi ti ṭha turin ka duh sak ṭhin–keini aia an chet ṭhat erawh a thiang lo," a ti a, hnehna chan ngei a tum dawn.
Moreno a inhliam
Champions League last 16 lut hlim Liverpool-in chanchin lawmawm lo an nei a, Spartak nen an inhneh ṭumin Alberto Moreno chu hliam vanga lakchhuah a ni a, James Milner-a'n a thlak. Klopp chuan, "Alberto Moreno kha thlak a ngai a, kan tan chuan chanchin lawmawm lo a ni. A dinhmun chiang takin a la sawi theih loh," a ti a, he thuziak i chhiar meuh chuan a dinhmun a chiang tawh mai thei.
Klopp chuan, "Match hautakin min hmuak nual a, player inhliam neih a hun lo hle. A bik takin Pathiannia kan inkhel tur hi a pawimawh lehzual a, kan theihna zawng zawng kan pek a ṭul dawn a ni," tiin Merseyside derby a thlir lawk.