Solskjaer aiin Lampard-a'n hna a thawk ṭha zawk - Keane

Manchester United leh Chelsea ten season tharah Champions League an khel ve ve dawn. United legend Roy Keane chuan a khelhpui ṭhin Ole Gunnar Solskjaer aiin Blues boss Frank Lampard-a'n hna a thawh ṭhat zawk thu a sawi.

Kum 48 mi Roy Keane chuan, "Ka thlirna aṭang chuan Ole Solskjaer aiin Frank Lampard-a'n hna a thawk ṭha zawk. Ka tehfung pawimawh tak chu an khelh dan hmang a ni a, Frank-a hote khelh danah a lungawi hle. "Frank hian thutlukna huaisen siamin player naupang ṭhahnem tak a lalut a, player-te hian theihna bakah khelhna hun an mamawh a, an hun ṭha neih an bawhpelh lo.

"League-a palina nih tuma inchuhna kawngah Frank a talbuai lo a, nipui transfer hmang thei lo chunga palina a ni thei hi result ṭha tak a ni a. FA Cup-ah an champion leh lek phei chuan hlawhtlinna ropui tak a ni ang," tiin Chelsea boss Lampard a dahsan zawk chhan a sawi.

Ole Gunnar Solskjaer-a hote pathumnaah an awm a, Frank Lampard-a hoten goal difference-ah chiah United pha loin palina an nih bakah FA Cup final khelh tur an la nei. Hei chauh hi a ni lo, Chelsea hian nipui transfer-ah player an lalut thei lo.

Manchester United-in Harry Maguire, Aaron Wan-Bissaka, Daniel James leh Bruno Fernandes te an lalut a, Lampard erawhin hrem vangin nipui transfer-ah player a lalut thei lo. January 2019-a Christian Pulisic an lalut hman erawh a vanneihpui a, Eden Hazard thlakna tur player langsar an lalut lo chunga result ṭha tak an neih avangin United captain hlui Roy Keane ngaihdan hi mi tam tak ṭawmpui tur a ni.