Zanin aṭangin World Cup Quarterfinal

Football thiam ram sawi apiangin Argentina lam hmaih a thiang lo, world champion vawi hnih ni tawh ang bawkin Netherlands hi inkhelh thiam ram an ni, zanin dar 12:30 hian ram pahnihin inkhel hmuhnawm bik an chhawp chhuak ang.

Qatar World Cup quarterfinal a ni tawh a, a boruak a sang dawn. Coach tawnhriat nei ṭha Louis van Gaal-a'n engtiang takin nge Lionel Messi leh a ṭhiante a hmachhawn dawn tih chu khawvel hmuh châk a ni.

Coach pahnih buk dawn ni ila, tawnhriat nei ṭha Van Gaal hi kum 71 mi a ni tawh, club ṭha Barcelona, Bayern Munich leh Manchester United te enkawl tawhin, an ram club Ajax chu Champions League nomawi a chawipui tawh - Dutch team tan ani aia ṭha an awm lo ang.

Argentina coach Lionel Scaloni hi kum 44 mi chauh a la ni a, a pa rual zet nen thluak hmangin an inbei dawn tihna a ni. Scaloni tan chuan World Cup hmasa ber a ni, mahse Copa America champion puitu a ni, a chungah Argentine mipuiten rinna an nghat ngam.

Messi vs Van Dijk
Goal khung a pawimawh tluk zetin a venhim hna a pawimawh. Lionel Messi chu Argentina tlarhma innghahna a ni leh dawn a, a vanglai angin che rangin tlan tam ber ni thei tawh lo mah se, kum 35 mi hi a thiamna erawh a la nep lo.

World Cup khelh laia goal thum khung tawhtu hian Virgil Van Dijk a hmachhawn a ngai dawn. Liverpool defender hi Nathan Ake nen an inkawp fuh em em a, La Albiceleste tlarhmate hi an ṭha tak zet em tih fiahna tur a ni ang.

Messi hi goal khungtu chauh a ni lo a, ball semtu pawimawh a ni tel. Box chhungah a che lut tam tawk lo a ni mai thei, mahse box pawn aṭang pawhin goal khung a thiam zawk emaw ni tih mai tur a ni - Mexico laka a chet dan kha Dutch defender ten an zir chian a ngai dawn.

Tharum leh ball kang lamah chuan Van Dijk hi chungnung zawk tura ngaih a ni a, an khingpui ten an tlan pelh mai mai ngai loh a nih avangin a nghet ve tawk, chutih rualin mi bum leh tlan pelh thiam bik Messi nen an intawng tur hi a hmuhnawm ngei ngei ang.

Gakpo hmabak Romero
Messi leh Van Dijk inbeihna a en a chakawm tluk zetin Argentina defender Cristian Romero-a'n tun World Cup bika striker hot bik Cody Gakpo dan a tum tur hi a hmuhnawm bawk ang.

Kum 23 mi Gakpo hi 6ft 4in a sang a ni a, ball kangah a hlauhawm. A lu bakah ke ding leh vei lam hmangin goal a khung ve ve tawh, a taksa peng engkim ven a ngai tihna a nih chu, amah vengtu tur Romero hi 6ft 1in a sang a ni thung.

Spurs defender Romero hian Saudi Arabia lakah a khel ṭha lo, a hnuah Poland leh Australia an khelh ṭum erawhin ngai a awh leh tawh, tun tournament an khelh dan thlir chuan Gakpo dang tur chuan tihsual a neih a thiang lo.

Gakpo hi a tlanchakin a rilru a fim a, goal hmaah a tluak a fim thei hle bawk, tun World Cup bikah pawh defender vawi ruk ngawt a tlan pel tawh, hmunawl siamsak chi a ni miah lo tihna a ni - Romero leh Nicolas Otamendi te tan hna a hautak dawn.

Midfield inbeihna
Argentina leh Netherlands inbeihna hmuhnawm tur bik zingah midfield lai a tel. La Liga team ṭha Barcelona midfielder Frenkie de Jong leh Atletico Madrid ball semtu Rodrigo De Paul ten chungnung zawk nih an inchuh ang.

De Paul-a mawhphurhna hi a sang ṭhin, tlarhnung a ding player ho a pui nasa tura ngaih a ni. Defender leh hmatawng ho inkar suihkhawmtu pawimawh a ni leh ang - Copa America final-a Angel di Maria goal khung tur siamsaktu a ni a, through ball a pek thiamzia sawi nawn a ngai lo.

De Jong hi ball keng thei, khingpuite tihsual nang ching thiam leh ball thawn chhuak zung zung thei a ni. Van Gaal pawhin a hman thiam berte zinga mi a ni a, hmathlir a neih thui bakah khingpui te goal bull ball pe thiam a nihna hi ven ngun a ngai dawn.

Ball sem thiam pahnih, team tana innghahna leh thlamuanpui tham an nih avangin anni hi danglamna siam theitu tur an ni dawn a, goal leh assist nei zut zut ṭhin ni lem lo mah se, team hnukpui an nih avangin a chungnung zawk nih a pawimawh khawp ang.

Messi ṭawng fimkhur
Lionel Messi tan World Cup hnuhnung ber a ni tawh dawn a, football inelna ropui bera champion chunga chawlh a duh a nih chuan tun hi a hun ṭha neih chhun a ni - Argentina champion pui a duh a, chumi tluk zetin a ropuina ti famkim turin World Cup a mamawh.

Australia laka goal a khung khan Messi hian World Cup knock out stage china a goal hmasa ber a ni a, tun hma lama a la tih theih ngai loh chu a ti thei phawt, hmabak hlen tur erawh a la ṭhahnem hle.

Messi chuan, "World Cup chu a tir aṭangin a awlsam lo, quarterfinal a nih tawh phei chuan a harsa dawn hle tih a chiang sa. Holland hi a khel ṭha tluang em em a, hmachhawn an harsa dawn tih ka sawi ngam.
"Player ṭha tak tak awmkhawm an ni a, coach ropui takin a kaihhruai an ni bawk," tiin an khingpui tur a dahsang hle a, khelmual chhungah erawh a chungnung leh ṭha zawk nih tumin a naute a fuih leh thung ang.

Argentina ṭantute an phur. Group stage chin phei kha chu La Albiceleste inkhel enna ticket kha hralh zawh ran ber a ni. South America ram aṭang hian mi 30,000 chuang Qatar ramah an zin lut, zaniah Dutch fans aia Argentina ṭantute an tam zawk a nih pawhin mak ti suh.

Messi chuan, "Hetiang tak maia thlawpna ṭha kan dawng hi a mak ka ti zawk. Sum leh pai, tha leh zung an sen zawng zawng hi a nep lo. Anni nena hlimna kan inṭawm thei hi ka lawm, a tawp thlenga hlimna siamsak ka duh," tiin a sawi.

Virgil van Dijk a inpeih
Netherlands inter-national defender Virgil van Dijk chuan Lionel Messi awmna Argentina hmachhawn tura an inepeih thu a sawi a, mimal inbeihna tur ni loin ram pahnih inkara inbeihna a nih thu a sawi bawk.

World Cup bikah chuan ram pahnih hi vawi hnih ve ve an inhneh tawh a, ṭum dang chu an inhnehtawk. An intawn hnuhnung ber chu 2014 World Cup semifinal kha niin, goal a luh loh hnuah South American ram hi penalty shootout-ah an chak ta zawk a ni.

Tunah pawh inhnehtawk a awm thei dawn lo, pakhat zawk zawk chu an tla dawn. Dutch defender Van Dijk chuan, "Team ṭha leh hlauhawm tak an ni a, khawi laiah pawh kan fimkhur em em vek a ngai dawn.
"Kan match hnuhnung berah khan kan khel ṭha ve hle a, duhthusam ang thlap a ni ṭep, tun ṭumah chuan khami aia ṭha zawk khan kan khelh a ngai dawn thung," tiin a ṭawng fimkhur hle.

Van Dijk chuan sawi zawmin, "Quarterfinal a ni tawh a, match thum chauhin ropuina ram min daidang tawh. A awmzia chu, ropuina chang turin khawvela player ṭha ber berte kan paltlang a ngai dawn tihna a ni."
"Kei leh Messi chung-chang sawi pawh a awm, zawhna pawh ka dawng ve nual. Mahse, Netherlands leh Argentina inbeihna tur a ni, hei chu mimal thil nen sawi zawm a remchang lo zawk, tiin a sawi.

Netherlands team hi tun hma lama Dutch team ropui tak ang kha chu an ni lem lo. Amaherawhchu, tuna an khelh dan hi chu sawi nep theih a ni lo, a takin an lantir thei zel. Ram ropui pahnih tan inkhel chhinchhiah tlak bik a ni dawn. - Lionel Scaloni

Lionel Messi hi khawvela player hlauhawm leh themthiam ber a ni a, midang tan a siamsak theih bakah harsa tak pawhin goal a khung mai thei. Mahse, ball an chan loh leh an hlohin a ṭangkai nep, chu chu kan tana remchang tur a ni ang. - Louis van Gaal