FIFA World Cup-ah tu nge top scorer ni dawn?

FIFA World Cup 2022-ah Kylian Mbappe chuan goal a la khung tam ber a, France forward hian goal nga a khung tawh. World Cup hnunung bera goal khung tam ber Harry Kane-a'n goal ruk a khung a, 2010 leh 2006 World Cup top scorer Thomas Muller leh Miroslav Klose ten goal nga ve ve an khung thung.

Kum 23 mi Mbappe tan goal nga hi Golden Boot dawn nan a tawk thei a, chutihrualin goal thum khung zingah Goncalo Ramos (Portugal), Lionel Messi (Argentina), Marcus Rashford (England), Bukayo Saka (England), Olivier Giroud (France), Rcharlison (Brazil) leh Cody Gakpo (Netherlands) te an la awm avangin PSG forward tan ngaih ṭha taka awm theih a la ni lo.

Goal khung zat hi a inang a nih chuan an ṭhiante goal khung tur an siamsak zat (assist) en leh tur a ni a, an assist neih zat hi a la inang cheu chuan minute khelh zat en leh tur a ni. Mbappe hian goal nga khung tura minute 297 a mamawh laiin Portugal tana goal thum khungtu Goncalo Ramos hi minute 83 chauh a la inlan. Player pahnih hian assist vawi khat ve ve an nei a, Ramos hian goal hnih a khung belh a nih chuan Portugal forward hi golden boot dawng tur chu a ni.