Spain coach aṭangin Luis Enrique a bang

Spain-in FIFA World Cup last 16-ah Morocco an hneh lo a, nimin khan Spanish Football Federation (RFEF) chuan Luis Enrique hi La Roja coach aṭanga a ban thu an puang. A thlakna tura sawi chu Spain Under 21 coach Luis de la Fuente a ni a, Thawhṭanni board meeting-ah nemngheh a ni ang.

Spain rama football thuneitu sang RFEF chuan, "Luis Enrique leh a coaching staff-te an hnathawhah kan lawm hle. Kum 2018-a Enriquea'n Spain team a enkawl aṭangin team-ah thathona a awm a, thil ṭhahnem tak a thlak danglam.

"Luis Enrique hian UEFA Nations League vawi thum kan hmachhawn aṭangin a sang pali zingah ṭum hnih min tlinpui a, Euro 2020-ah khelh dan phung mawi tak nen semifinal min thlenpui bawk. Player naupang zawk khelhna hun pein Spain football-in hmalam hun êng tak a nei phah a ni," tiin Enrique an thlah.

Spain-in last 16-a Morocco an hneh tak loh avangin La Roja hian kum 10 chhung major trophy an chawi tawh lo. RFEF chuan 'project thar' an siam tur thu a sawi.

La Roja hian inelna lian thama an champion hnuhnun ber chu Euro 2012 a ni a, fi nalah Italy 4-0 in an sawp. Hemi hma hian World Cup 2010 leh Euro 2008 nomawi an chawi bawk a, kum li chhung chu khawvel football an awp hneh.

Enrique hnuaiah game mawi khel mah se sawiselna erawh a tam tho. Barcelona manager hlui Enrique hian Catalan club player-te a duhsakah an ngai a, tun ṭum inelnaah Barca player pariat awmin team innghahna an ni. Spain hian result chu che ṭha se Enrique hian fak a hlawh a tur a ni a, mahse Costa Rica 7-0 a an sawp hnuah chak an neih tak loh avangin dem a hlawh phah hle.