Local Football-ah Lal Thar kan ni ve ta - Lalrammawia, Chawnpui FC president

Mumang ang ruai nimai hian ka la hria. Mahse a lo thleng tak tak si. Chawnpui Veng hian Gospel Centenary kum 1994 khan khua leh veng football inelna bik, Centenary Cup-ah champion nomawi kan lo chawi tawh. Mizoram club-te tana inelna sang ber 'top flight'-ah champion nomawi kan la chawi ngai lo thung.

Chawnpui FC tan mellung thar a ni a, kan vengin kan la tawn ngai loh tunah chuan kan siam ve ta. Pathian awmpuina leh malsawmna a vang liau liau a ni. Min chawimawitu Pathian hnenah lawmthu kan sawi mawlh mawlh e. Keini hi chapo thei kan ni lo, Pathian malsawmna kan dawn vang chauh a ni.

Head Coach Sanga Hmar hi Chawnpui FC-ten thawhpui a nuam kan ti. A thawhrimna leh inpekna, a tih tak takna a vangin tun hun kan thleng. Mizoah hian football coach ṭha tak tak an awm a, chutihrualin tuna active coach-ah chuan Sanga hi ka dah san ber chu a ni a, tlukpha an awmin ka hre lo.

A hrechiang loten min hnial mai thei a, mahse kei chu Sanga Hmar hrechiang tu ka ni a, tupawhin min hnial se ka ṭanna hi ka sawh sawn lo ang. Kumina Sanga football academy Aizawl South Football Academy (ASFA) te nena kan thawk ho thei hi lawmawm kan ti a, kan chawng chhang hle. Chawnpui FC leh ASFA hian tun season MPL-ah mumal takin thawhhona thuthlung kan siam hi kan ti fuh. ASFA hi mi tam takin a la pan belh zel ka ring.

A tawp berah chuan Chawnpui GSA te thlazarna hnuaiah Chawnpui FC te hi kan kal a. Kan hruaituten engkimah min uapin min support tlat a, anni avangin Pathian malsawmna kan dawng. Chawnpui Veng mipuiten kawng hrang hrang min ṭawiawmna leh thlawpna te hi a ropui takzet. Min duhsaktu kan 'donor/sponsor-te' zawng zawngte chungah pawh lawmthu kan sawi. Tunah chuan Mizo local football-ah 'LAL THAR' kan ni ve ta. Pathian ropui ber rawh se.