United khelh danah Ten Hag a lawm lo

Manchester United chuan Nilaini zan khan friendly match-ah Spanish club Cadiz an hmachhawn a, 4-2 in an hneh lo. December 10, Inrinni zan dar 10:30 hian Erik Ten Hag-a hote hian Real Betis nen friendly match an khel leh ang.

Estadio Nuevo Mirandilla-a inkhelah Cadiz-in Carlos Sanchez leh Anthony Lozano te hmangin an khung hmasa a, Man United-in Anthony Martial leh Kobbie Mainoo hmangin siphurh an sut. Mualneitu Cadiz tan Ruben Sobrino leh Tomas Alarcon ten an khung belh a, 4-2 in hnehna an chang.

Dutch manager Erik Ten Hag chuan, "Inkhelh ṭantirh minute 15 kha keini ang team-ah chuan a thleng tur a ni lo. Kan insiamṭhat a ngai. Kan khelh danah ka lawm lo a, chak loh ṭumah pawh a ṭha lai a awm ṭhin. Tun ṭumah erawh a ṭha lo lai a tam zawk," tiin a sawi.

Man United-in competitive match an khelh hmasak ber tur chu League Cup a ni dawn a, December 21, Nilaini zanah Burnley nen League Cup last 16-ah an inhmachhawn ang.