Intlansiak duhtu Lewis Hamilton

Formula 1 champion lai Lewis Hamilton chuan season hman loh aiin entu awm loa tlan mai a ṭhat zawk a ring a, khawhar thlak deuh mah se infiamna khawvel tan a ṭhat a beisei thu a sawi bawk.

Mercedes driver Hamilton chuan, "A nihna takah chuan fans hi intlansiak ti nuamtu an ni a, infiamna khawvelah chuan an tel lo chuan a khawhar thlakin a nawmna pawh a tlahniam hle ang tih a chiang.

"Fans awm lo chuan a ruak dawn, a khawhar thlak takzet ang, duhthusamah chuan a hmuna entu awm chung ngeiin intlansiak thei ila tih hi a ni, mahse hri leng vangin a ṭha leh duh ber thlan theih a ni si lo," a ti.

Car intlansiakna sang ber hi March thla khan season bul ṭan tawh tur a ni a, mahse coronavirus vangin tun thlengin an la tlan lo. July thla hian Austria Grand Prix chu a hmuna entu awm loin tlan theih an in beisei, hei pawh hi a la chiang chuang lo.

Britain tlangval Hamilton chuan, "Mi hrang hrang hnen aṭangin thu ka dawng hnem, a tam ber chuan infiamna lam en an chak thu a ni. A hmunah entu awm thei dawn lo mah se khawvel boruak thlir in inelna neih theih chu a ṭhat zawk ka ring," a ti.

Kum 35 mi Hamilton hian F1 nomawi vawi ruk ngawt a chawi tawh a, khawvel driver record nei ṭha ber Michael Schumacher (7 titles) nih rual turin vawi khat champion chiah a mamawh tawh.

F1 team lamin season hman dan tur chungchangah thu mum an nei hlei thei lo, thuneitu ṭhenkhat chuan tun season hman loh tawp an duh laiin, F1 neitu Liberty Media lam chuan world championship neih theih an la beisei reng thung.