Chelsea thar - Werner leh Ziyech Lampard vangin London club ka zawm - Werner

Chelsea thar hi season thara Premier League ti hmuhnawmtu tur a ni. Frank Lampard hian season khatnaah hrem vangin player a lalut thei lo a, hemi a nih avang hian English manager hian sawiselna tur tam tak leh pressure a pumpelh.

Season thar erawh a danglam tawh dawn. Club neitu Roman Abramovich leh director Marina Granovskaia ten Lampard an thlawp ṭha hle. Tun season zawh hma hauhin Ajax aṭangin Hakim Ziyech leh RB Leipzig aṭangin Timo Werner te an lakluhsak der tawh. Premier League club lian dangin player an lakluh hma hauhin Chelsea-in pathumna atan Kai Havertz an lalut hnai a, a tawpna tur niin a lang lo zel bawk nen Chelsea thar en an châkawm ta hle.

Nipui transfer boruak ti ngaihnawm ber tura ngaih chu Timo Werner a ni a, Germany international hian chona thar a hmachhawn duh tih chu tlang hriat a ni. Amaherawhchu Werner hian Premier League champion Liverpool tana khelh a hreh loh thu a zep lo a, club dang tan thlem chhuah a awl ai lo.

Liverpool-in RB Leipzig phalna zat pawisa an thehchhuah phal tak loah chuan Chelsea an rawn lang a, Blues neitu Abramovich-a'n a player hlui Lampard-a'n tan pound maktaduai 54 zet a theh chhuak. Club leh club inkar a fel a, player hmin kawngah English manager Lampard-a'n a tih tur a ti ve bawk.

Chelsea player thar Timo Werner chuan, "Kan (Lampard nen) inbiak ṭumin Chelsea khelh dan hmang kan sawi nasa hle. Min khelhtir duh dan chiang takin min hrilh a, ka khelh dan a hmuh tawh avangin min hrechiang a, kan rilru a inhmu hle a ni," tiin Lampard vanga Chelsea zawm a nih thu a sawi.

Werner chuan sawi chhun-zawmin, "Chelsea-in Champions League an champion ṭum khan player angin ka hria a, Petr Cech-a'n technical advisor hna thawk a, an zinga ka tel tur hi ka tan chuan mumang ram ang mai a ni. Chutihrualin anmahni ang nih ka tum lo a, team tharah player pawimawh nih ka duh a, ka theihna zawng zawng ka hlan ang," tiin a sawi.

Kum 24 mi Timo Werner hi VfB Stuttgart aṭanga inzir chhuak a ni a, hming chherna ber erawh RB Leipzig a ni. Werner hian Germany tan vawi 29 a inlan tawh a, a tlan chakna hi a larpui. A hming lemah pawh 'Turbo Timo' tih ngat a ni.

Season liam ta khan RB Leipzig tan Bundesliga match zawng zawngah a inlan vek a, league match 34-ah goal 28 khungin Robert Lewandowski chiah a tluk lo. Werner chuan, "Premier League inkhel hi a rang em em a, ka ṭhatna tak pawh ka ranna hi a ni ve bawk. Ka tan chuan helai hmuna lo kal hi duhthusam a ni a, hmasawn zel duhin ka rawn kal," tiin hmasawn a tum thu a sawi.

Chelsea-in Ajax aṭangin pound matkaduai 33.3-in Hakim Ziyech an lalut a, Moroccan star hi a chet ṭhat dan a zirin a man hi pound maktaduai 36.6-ah a pung chho thei ang.

Werner leh Ziyech te hi Chelsea training-na hmun Cobham-ah an inlan tawh. Chelsea-in an youtube channel-ah training lai video an dah chhuahah Ziyech hian a ke vei lama ball a lak hnuah Pedro volley turin mawi zetin a pass lehnghal a, Ajax kawr nena hmuhnawm Ziyech kha Blues kawr nen pawh a la thiam reng.

Amaherawhchu Chelsea thar hi season tharah chauh a hmuh theih dawn. Frank Lampard-a hote hian August 1, Inrinni zan hian FA Cup final-ah Arsenal an  hmachhawn dawn a, Champions League Last 16 second leg-ah Bayern Munich nen la inkhel dawn mah se an player tharte an la chhawr thei lo ang.