Brazil tan fiahna hautak a inchhawp

Zaninah World Cup quarterfinal match hmasa ber khelh a ni dawn a, zan dar 8:30-ah Croatia leh Mizo mipui ṭan rawn Brazil an intawng dawn - a hmuhnawm loh ring suh.

Croatia-in Morocco, Belgium leh Canada awmna group paltlang chungin last 16 an lut a, tun inelnaa khel ṭha tak Japan nen 1-1 a an inhnehtawk hnuin penalty-ah an chak a, quarterfinal an lut.

Champion rin kai zinga mi Brazil-in Serbia leh Switzerland an hneh hnuah Cameroon an ngam lo a, mahse, Neymar an neih meuh chuan last 16-ah South Korea 4-1 in an sawp.

Brazil hi knockout round-a khelh kim duh vanga third choice keeper la luhtir thei team an ni a, Croatia hneh tur khawp player neiah an inngai ang.

A rei ta

Football thiam ram sawi an nih apiangin Brazil sawi hmaih an ni ngai lo a, vawi nga ngawt world champion an ni tawh. Mahse, an champion hnuhnun ber hi kum 2002 daih kha a ni tawh a, hemi hnua semifinal an khelh hnuhnung ber chu 2014 kha a ni - Germany-in 7-1 ngawtin an la sawp zui!

Brazil champion lohna a rei tawh a, Neymar leh a ṭhiante tan tun hi champion chance ṭha bera chhal theih a ni hial - kil tinah world class player-a chhal ngam ṭhiau an nei a, tlarhnung aṭanga hma thlengin an ṭha vek.

Mahse, he team hian Neymar tel loin Switzerland leh Cameroon lakah harsatna an tawk a, hei hi Croatia hian an hrechiang dawn - an tih tur hmasa chu Paris Saint-Germain forward Neymar dah ṭhat a ni.

Tlarhnungah Dejan Lovren, RB Leipzig defender Joško Gvardiol, Celtic right back Josip Juranovic leh VfB Stuttgart left back Borna Sosa te mawhphurhna a sang dawn tihna a ni a, midfield-ah Luka Modric, Marcelo Brozovic leh Mateo Kovacic te chu Brazil tana buaina thlen tur khawpin an ṭha tawk bawk.

Brazil an ṭha

Croatia tan tlarhmaah Dinamo Zagreb striker Bruno Petkovic, Hoffenheim forward Andrej Kramaric leh Tottenham Hotspur winger Ivan Perisic te chu inkawp tura ngaih an ni a, Brazil tlarhnunga Alisson, Thiago Silva, Marquinhos, Danilo leh Eder Militao su tur khawpin an ṭha tawk ang em, tih chu a chhanna pek kan ni thuai dawn.

Brazil tan Gabriel Jesus leh Alex Telles te chu tun World Cup chhung hliam vangin an inlan thei dawn lo a, hei erawh buaina tur niin a lang lo a, Alex Sandro pawh khel bawr hliam vangin a dinhmun a chiang lo bawk.

Midfield-ah Casemiro leh Lucas Paquetá chu innghahna tur an ni dawn a, an hmaah Neymar chu duhthala tala tura zalenna pek niin, Raphinha leh Vinicius Jr ten mual sir aṭangin a laia awm Richarlison an thlawp ang.

Team pahnih squad khaikhin tur ni se, Brazil an chungnung zawk - mahse, he Croatia hi World Cup 2018 final lut thei kha an ni a, Cameroon-in Brazil an hneh thei tih hre chungin Selecao hi an hmachhawn ang.