Chanmari dinhmun a derthawng

Nimin khan Lammualah Chanmari FC leh Sihphir Venghlun FC ten MPL Playoff first leg an khel a, 1-1 in an inhnehtawk. Second leg hi December 10, Inrinni zing dar 8:00 hian RG Stadium-ah khelh a ni dawn.

MPL vawi hnih champion Chanmari hian Lalremruata hmangin minute 27-naah an khung hmasa a, K. Malsawmkima hote hian hnehna an chang mai dawna a lan laiin Sihphir Venghlunin minute 83-naah Dinliansanga hmangin an sut.

MPL Playoff-ah hian away goal rule a awm a, Sihphir Venghlun dinhmun a ṭha ta zawk. First leg hi Chanmari FC tan home match a ni a, second leg-ah goal awm loa an inhnehtawk a nih chuan Chanmari FC an relegate ang.

MPL Playoff
First Leg - December 8, Ningani
Chanmari FC 1 - 1 Sihphir Venghlun FC
CFC : Lalremruata 27'
SIH : Dinsangliana 83'
Second Leg - December 10, Inrinni
Sihphir Venghlun FC 8:00 AM Chanmari FC

MPL9 Handbook
Relegation

• Round 14 khelh zawh hnua club zinga a hniam ber (pariatna) chu Mizoram Premier League aṭangin an tla ang a, season tharah a in-register-na District FA hnuaia division sang berah a awm ang.
(FC Bethlehem chu pariatnaah an awm a, MPL aṭangin an relegate. Season tharah Aizawl DFA hnuaia first division-ah an awm ang)
• Club hniam ber dawttu (pasarihna) chuan MPL Qualifying-a pahnihna nen ‘Playoff’ an khel ang a, an chak chuan MPL-ah an la awm ang. An chak lo a nih chuan season tharah a in-register-na District FA hnuaia division sang berah a awm ang.
(Club hniam ber dawttu chu Chanmari FC an ni a, MPL Qualifying-a pahnihna Sihphir Venghlun nen MPL Playoff-ah an inhmachhawn)
• MPL Playoff hi double leg-a khelh tur a ni a, an inhnehtawk a nih chuan ‘away goal’ rule hman tur a ni. Away goal rule hman hnua an inhnehtawk chuan penalty shootout hmanga chak zawk zawn a ni ang.
(Away Goal Rule a awm. First leg hi Chanmari FC tan 'home match' a ni a, Sihphir Venghlun hian away goal an nei a, second leg-ah 0-0 a inhnehtawk chuan an tling)