Dutch GP awm zel dawn

Formula 1 thuneitute chuan Netherlands ramah inelna an buatsaih zel dawn. Dutch Grand Prix nen hian kum 2025 thleng daih contract an ziak thar, driver champion lai Max Verstappen tan chuan chanchin lawmawm bik a ni ang.

F1 hian hmalakna tizau viau mah se, tun season laihawl vel khan ram ṭhenkhat chuan car intlansiakna sang ber hi an thleng chhunzawm thei dawn lo niin an sawi, chung zingah chuan Dutch GP pawh a tel.

Driver leh mi hrang hrang an ṭawng chhuak a, hei hian nghawng a nei pawh a ni mai thei, tunah chuan inremna rei zawk an nei thei. Tlankawng sir khat tlata serthlum rawng ha fans pungkhawm kan hmu zel dawn tihna a ni.

Formula 1 president leh chief executive ni bawk Stefano Domenicali chuan, "Dutch Grand Prix hi hun rei tak hnuah 2021 khan kan tlan leh a, rei lote chhungin mipuite ngainat leh en châk berte zinga mi a ni thei hial.

"Tun hnai season hnih chhungin a hmuna enna tur ticket zawng zawng chu hralh vek a ni a, chuvangin kan nei chhunzawm zel thei tur hi ka lawm hle," tiin a sawi a, intlansiak chu khawvel ram hran hranah a zau thei ang bera neih an duh thu a sawi bawk.

Dutch Grand Prix hi nakkum August 25-27 chhungin neih a ni dawn, nipui chawlh hman hnua intlansiak lehna hmasa ber a ni dawn a, mipui ngaihven a hlawh hi a mak hran lo.