Bangladesh-in India an hneh nawn

India-in T20 World Cup-a beisei an phak loh hnuah Bangladesh tlawhin beisei an pha lo chhunzawm. Rohit Sharma captain-na hnuaia khel India hian ODI match hmasa pahnihah Bangladesh an hneh lo a, Tigers hian series an la chiang tawh.

ODI match hnihna hi Sher-e-Bangla-ah Nilaini khan khelh a ni a, ṭhumvawra vannei Bangladesh-in vuak hmasak an thlang. Tigers tan Mehidy Hasan-a'n ball 83-ah thi loin century a siam a, Mahmudullah-a'n 77 runs a siam ve bawk avangin over 50-ah 271/7 runs an siam.

India bat hun a thleng a, opener pahnih Virat Kohli (5) leh Shikhar Dhawan (8) ten beisei an pha lo. Shreyas Iyer-a'n 82 runs zet a siam a, Axar Patel-a'n 56 runs siam bawkin India-in beiseina an nei ve zel. India captain Rohit Sharma-a'n fielding-naah a kut a ti na a, pakuanaah a lut chauh. Rohit hian ball 28 lekah 51 runs siamin India a chakpui teuh hle.

Rohit hian over tawp berah six vawi khat leh four vawi hnih hlap chhuakin hnehna chang turin ball tawp berah run nga an la mamawh a, a awmzia ber chu six run vuak a ngai. Mahse Rohit aiin Bangladesh bowler Mustafizur Rahman a che ṭha ta zawk a, India captain-in run a siam tak loh avangin Tigers hi run ngain an chak.

ODI match hnuhnung ber hi December 10, Inrinni hian an khel dawn a, hemi zawh hian Test match an khel chhunzawm dawn. Test match hmasa zawk hi December 14-18, 2022 inkar hian Zahur Ahmed Chowdhury Stadium, Chittagong-ah an khel ang.