ATP chief a la beidawng duh lo

Mipa tennis thuneitu sang Association of Tennis Professionals (ATP) chairman Andrea Gaudenzi chuan kuminah inkhelh theih a la beisei a, season hman lai titawp tura thutlukna siam nan chuan a la hma lutuk niin a sawi.

Covid-19 vangin March thla aṭang khan tennis inelna an chawl vek, tuna a lan dan chuan July 13 hma lamah tournament pangngai a awm dawn lo - Indopui II-na hnu lama a vawi khat nan Wimbledon chu an ṭhulh.

Gaudenzi chuan, "Hun harsa kan hmachhawn hi tun hma lama la thleng ngai lo a nih avangin hriatthiam a har, season tih tawp nan chuan a la hma lutuk deuhah ka ngai a, eng nge rawn thleng leh dawn tih chu kan phak tawkin kan ngaichang reng.

"Tennis tournament nei tur chuan ram hrang hrang aṭangin player an zin khawm a ngai ṭhin, ram tam zawkin mikhual thlen an la duh loh avangin tunah chuan inelna neih beisei theih a la ni lo. Dawhthei taka nghah chu kan tih theih sang ber a ni rih," a ti.

May thlaa khelh tur French Open chu September thla atan an sawn tawh, clay court inelna lian hi a hun hi tih danglam a la ngai leh hial mai thei; entu awm loa khelh zawk pawh a ni thei bawk. August thla tawpa khelh tur US Open erawh a hun pangngaia khelh theih an la beisei reng.

Gaudenzi chuan, "July thlaa khelh tur tournament ho dinhmun ti chiang tur chuan May 15 thleng hun kan nei, August thlaa khelh tur ho ti chiang turin June 1 thleng hun a awm bawk. Tournament khelh hma chawlh kar ruk vel a la awmah ti chiang ṭhin ila a tawk chauhin a rinawm," a ti, thutlukna lian tham siam turin a hmanhmawh lo.

Player tam takin inkhelh theih an chak tawh, world number 2 Rafael Nadal chuan eng tournament pawh an buatsaih a nih chuan a khelh tur thu a sawi tawh. Czech Republic chuan an ram chhunga player bikte tan tun thla tawp hian inelna an buatsaih dawn.