NorthEast Derby-ah Aizawl FC an chak

I League-ah Aizawl FC an chak ve leh ta - Mizo club hian nimin khan an mikhual Neroca FC chu 1-0 in an hneh a, Japanese defender Akito Saito chuan inkhela goal awmchhun hi a tauh lut.

Mizo club hi damlohna avanga coach Henry Stanley Rozario nena inṭhen hlim an ni a, assistant coach Victor Lalbiakmawia leh Lalrozama Fanai ten Aizawl FC team an kaihruai chhunzawm zel.

RG Stadium, Mualpuiah Mizo club-in inkhel ṭantir aṭangin goal khung tumin an nawr a, R. Lalthanmawia, R.Ramdinthara, Lalchhanhima Sailo leh Henry Kisekka ten chance duhawm an nei vek a, mahse, an chhawr lo vek!

Kisekka hian first half tawp hmain goal-a khungah inngai mah se James Singh laka a foul hman avangin a goal khung hi pawmsak a ni lo a, Ugandan striker vanneih ni a ni lo.

Minute 60-naah erawh Mizo club an vannei ta nge nge - R. Lalthanmawia corner pet ṭha zet chu Akito Saito chuan a tauh lut a, hun tawp thlenga goal dang a luh loh avangin Aizawl FC an chak.

Mizo club-in league match rukah vawi hnih hnehna an channa a ni a, table-ah parukna an ni ta - Neroca erawh pakuanaah an tla thla a, an hnuaiah team pathum chauh an awm tawh.

Inkhel Result
Aizawl FC 1 - 0 Neroca FC
AFC: Akito Saito 60'

Trau 2 - 0 Roundglass Punjab FC
TRA: Buangthanglun Samte 25'; Salam Johnson Singh 55'