Premier League khelh a la hun lo - Rose

England leh Tottenham defender Danny Rose chuan coronavirus buaina kara Premier League khelh tumna awm chu ṭha lo a tih thu a sawi chhuak.

Newcastle tana loan hmanga khel lai kum 29 mi Rose chuan, "Covid-19 vei hi a tlahniam duai a nih loh chuan football hi chu la sawi loh tawp tur a ni. Inelna buatsaih a nih chuan mi tam tak nunna atan a hlauhawm," tiiin Premier League khelh a thlawp rih loh thu a sawi.

June 1 hma chu England-ah infiamna eng chi mah huaihawt phal a ni lo a, June thla aṭang erawhin entu awm loin infiamna chi hrang hrang neih chhoh a ni ang.

Inrinni khan Brighton player pathum chu Covid-19 an kai tih hmuhchhuah a ni a, Norwich City midfielder Todd Cantwell chuan, "Mipui zinga mi ve mai kan ni," tiin tih theih an neih loh thu a sawi.

Manchester City striker Sergio Aguero pawhin Covid-19 buaina kara inkhelh a hlauh thu a sawi a, City tana a khelhpui Raheem Sterling pawhin, "Mipui leh player an him tih finfiah a nih hma hi chuan ka hlau lo ti ngawt thei ka ni lo. Thil thleng thei hi a tam. Ka ṭhiante zingah Covid-19 vanga chhungte chan an awm a, chuvangin kan fimkhur hi a ṭul a ni," tiin inelna ṭan a la hun lo nia a hriat thu a sawi.