Napoli ngam loh Inter Milan

Inkhel hun tam zawk thununtu Napoli chuan goal an khung thei lo a, team huaisen zawk Inter Milan chuan Thawhlehni zana an mikhual Gennaro Gattuso naute hi Danilo D’Ambrosio leh Lautaro Martinez te goal hmangin 2-0 in an lo hneh.

Serie A champion a chiang tawh a, a sang pali tur pawh an chiang tawh - pahnihna aṭanga palina inrem dan tur erawh a la chiang lo. Pahnihna nih tum Atalanta-in Parma an hneh hnuah Inter an chak ve leh; Antonio Conte enkawl Inter hi pahnihnaah an awm.

Hrem vangin Inter-in midfielder Roberto Gagliardini an chhawr thei lo a, hliam nei midfielder Stefano Sensi a chawlh a la ngai. Napoli forward Dries Mertens pawh hrem vangin a inlan thei bik lo. Matias Vecino, defender Kostas Manolas leh striker Fernando Llorente te an chhawr thei lo bawk.

Gennaro Gattuso-a'n Champions League-ah Barcelona an la hmachhawn dawn tih hrereng chungin player ṭha a chhawr lui lo, tun hnaiah match an ngah avangin 100% ni lo chunga chhawr a duh loh bakah, player ṭhenkhat chu hahchawlhna hun a pe.

Antonio Conte naute hian Serie A bakah Europa League khelh hmabak an la nei ve tho. Italian manager hian a naute khel ho tam tura a duh avangin a neih ṭhat a chhawr a, tun hnaia khel ṭha Alexis Sanchez chu bul ṭantu zingah a tel.

San Siro-ah Inter an che fuh hmasa, minute 11-na lekah mual ding lam aṭanga ball rawn kal chu Lukaku-a'n tauh phak lo mah se Cristiano Biraghi chuan box chhungah cross let nghalin, vengtu nei loa awm Danilo D’Ambrosio-a'n cool takin a khung.

Napoli lamin ball chang tam zawkin na takin an nawr tawm. Midfielder Piotr Zielinski-a'n hun ṭha nei mah se goal zawnah a pet lo, forward Lorenzo Insigne khung ngei tur nia lang chu keeper Samir Handanovic-a'n a lo dang hman hlauh. 

Minute 74-na a ni a, mualneitu Inter bawk an che fuh. Season duhawm hmangtu Martinez-a'n mual laihawlah ball a chang a, hma zawnga tlanpuiin hla deuh tak aṭangin goal lamah a pet thut - keeper Alex Meret dan phak lohin goal kilah a lut.

Inter Milan manager Conte chuan, "Napoli hi tun hnai season thum chhung vela Juventus elphak ber an ni a, player an nei ṭha hle bawk. Anni laka goal hnih khung bakah mahni goal venhim hi chanchin ṭha a ni.

"League nomawi kan beisei thei tawh lo a, season ṭha ber chu a ni lo. Amaherawhchu kei leh ka naute hian theihtawp kan chhuah a, kan laka beiseina sang tak awm hian chona leh phurna min siamsak. Pahnihna nih tuma inelna pawh hi tawnhriat ṭha tak a ni," a ti.

Napoli coach Gattuso chuan, "Hun ṭha vawi nga kan insiam thei a nih chuan vawi khat tal chu a lut tur a ni, khatiang ang taka chance insiam hnem chunga goal neih loh kha chuan kan tuar tur chu a ni. Theihna sang tak neih pawh hian fimkhur tawk loh chuan goal a him lo," tiin duhthusama an khelh loh thu a sawi.

Thawhlehni zan Serie A inkhel dangah Atalanta chuan goal an phurh hmasak zet hnuah Parma 2-1 in an lehthal. Parma tana Dejan Kulusevski khung chu mikhual lamin Ruslan Malinovskyi leh Papu Gomez te hmangin an chhanglet.

Season hmasa khan Atalanta hian point 69 hmuin pathumna dinhmun an luah a, mi tam tak chuan an chet fuh vang maiah an ngai. Tun season-ah Gian Piero Gasperini naute hian khelh hmabak pakhat nei chungin point 78 an nei der tawh - tihfuh vang ngawt chu a ni ta lo, thiam a ngai tel.

Atalanta coach Gasperini chuan, "Hliam vangin player ṭha ṭhenkhat chhawr theih loh lai kan nei ṭhin, chuti chunga heti zat point kan hmu thei hi ka lawm," a ti. Serie A match 37 an khelh tawhah goal 98 an khung tawh, season hmasa ang bawkin a khung hnem ber an ni mek.