Blues tana Terry pawimawhna kha a thuk - Conte

Antonio Conte chuan Chelsea a enkawl lai hun a sawi chhuak a, captain John Terry chu Blues-in hlawhtlinna an chan theih nana mi pawimawh bik, huhang nei lian tak a nih thu a sawi.

Italian manager hian Stamford Bridge a pan aṭanga season hmasa berah Premier League nomawi a chawi nghal a, kha tih lai khan tlarhnungah Terry a la ding thei a, English defender hian league nomawi panga a chawina chiah a ni bawk.

Conte khan Terry kha a chhawr tam lo, league-ah khan vawi ruk chiah inkhel bul a ṭantir a, bench aṭangin vawi thum a dah lut bawk - season tluanin match kua chauh khelhtir mah se khelmual pawn lama Terry pawimawhna a hmuh hmaih chuang lo.

Blues manager hlui Conte chuan, "Chelsea ka enkawl a, chumi team-ah chuan player ropui John Terry a awm. London khawpui ka pantirh khan ani hian kawng hrang hrangin min pui nasa hle.

"A vanglai a pelh tawh avangin khelmual chhungah ka tan hna a thawk hnem lo a ni mai thei, a thu min hrilh leh player dangten an zahna kha chu ropui tak a ni," tiin a sawi.

May 21, 2017 khan Chelsea chuan Sunderland an hmachhawn, league champion ni chiang tawh mah se inkhel pawimawh bik a la ni. John Terry chuan Blues jersey ha chunga a match hnuhnung ber a khel a, minute 26-naah thlak a ni!

Conte chuan, "Minute 26-naah thlak a duh, a chhan chu a jersey number zat a nih vang a ni. Khatiang hun hlu bik ka tawn pui thei kha ka lawm a, kei leh team tana a hnathawh zawng zawng kha ka theihnghilh tawh lo ang," tiin a sawi.

Italian manager hi 2018 khan Chelsea chuan an ban, tun season aṭangin Inter Milan a enkawl. Inter hi Serie A nomawi chawi thei zingah a awm pui mek, an chungah champion lai Juventus leh Lazio an la awm.