China leh Japan Open an khel thei dawn lo

Badminton World Federation (BWF) chuan coronavirus vangin kumin tawp lama khelh tur China leh Japan Open chu an ṭhulh thu an puang. Inelna awm theih loh tur thu hi nimin khan tihchian a ni.

BWF secretary general Thomas Lund chuan, "Tournament a awm theih dawn loh avangin pawi kan ti takzet, badminton ngainatute hriatthiamna kan dil a, chutihrualin mahni hriselna ngai pawimawh vek turin kan chah bawk," a ti. Nakkumah chuan khelh theih ngei an beisei thu a sawi bawk.

China leh Japan Open bakah hian Taipei Open pawh an lo ṭhulh fel tawh. March thlaa khelh zawh tak All England Championship hnu lamah khan badminton inelna pangngai a la awm leh rih lo.