Champion thei zingah kan tel lo - Conte
West Ham-in manager David Moyes hnuaia an vawi khat chakna ni turin champion lai Chelsea 1-0 in an hneh. Inrinni zanah Marko Arnautovic-a'n goal awmchhun minute rukna lekah a khung a, Hammers-in Blues an dang tluan bawk.
London Stadium-a an chak loh zawhah Italian manager Antonio Conte chuan, "Champion thei zinga tel tur chuan result neih ṭhat ve reng a ṭul. Keini erawh match 16-ah vawi li kan chak lo tawh a, kan tel ve tawh lo," tiin champion nawn a inbeisei loh thu a sawi.
Moyes hnuaia harhna?
Hammers-in Moyes-a hnuaiah match nga an khel tling chiah a, an record aṭangin Chelsea lakah point hmuh beisei lo mah se point thum lawih an hlawh chhuak.
Scottish manager Moyes-a'n result ṭha nei turin England number 1 Joe Hart chu bench-ah a dah a, Andy Carroll leh Javier Hernandez aiah club player manto ber, pound maktaduai 20-a an lakluh Arnautovic a luhtir bawk. Stoke City striker hlui Arnautovic hian Chelsea an hmachhawn hma hian Premier League match 11-ah goal a khung lo a, Slaven Bilic-a banna chhan ang hiala ngaih a ni.
Blues lakah Arnautovic-a'n mawi zetin ṭan aṭanga hun rei loteah a pet goal a, Austrian striker hian goal khung lawmin mipui lamah a zuang phei nghalin a lawm dan hian a theihna zawng zawng a chhuah tih hmuh hmaih theih a ni lo. Hammers-in goal ven hna an thawh hnuah pawh Arnautovic-a'n Blues tlarhnung a la tibuai a, Blues defender Andreas Christensen kut a fuh avanga a penalty beisei erawh pek a ni lo.
Hammers tan Arnautovic chauh ni loin an tlarhnung an che ṭha tel a, Hart aia lut keeper Adrian a khelh ṭhat avangin khelhna hmun a chang chho zel ang.
Beisei a tawp
Chelsea-in West Ham an hneh loh hmain Crystal Palace leh Burnley te an hneh tawh lo a, hmahruaitu Manchester City an hneh tawh lo bawk.
Season chanve an la khel tling lo a, Blues hian match 16 aṭangin point 32 hmu tling mah se Pep Guardiola hnuaiah City dan an harsa a, hmahruaitu an phak lohna hi Manchester Derby result chhiar tel loin point 11 a ni.
Blues midfielder N'Golo Kante leh wing back David Zappacosta te goal khung tur Adrian-a'n a dan sak a, Conte hote an khel chhia tih tur ni lo mah se team ṭha bik khelh dan tur chuan an khel chhuak pha lo hle.
Italian manager Conte chuan, "Chak loh zawha champion chungchang sawi chu thil inhmeh lo tak a ni. Champion tur chuan season chanve chhungin vawi hnih khat bak kan chak lo tur a ni lo. Champion thei zingah hian tun season-ah kan la tel lo hrim. Season harsa tak kan hmachhawn dawn tih ka sawi lawk a, kha kha thudik a ni," tiin champion chungchang a sawi duh lo.
Season liam ta khan Chelsea-in European competition an khel lo a, tun season-ah erawh Champions League an khelh avangin an champion season leh tun season khaikhin a rem lo. Italian manager Conte hote hi champion tur zing aṭanga sawi bo nan chuan a la hma a, champion nawn tur erawh chuan chetsual a thiang tawh lo ang.