5 Ballon d'Or, 5 Goals; Ronaldo a lo kir e

Ningani zanah a vawi nga nan Ronaldo hnenah Ballon d'Or chawimawina hlan a ni a, Inrinni zana Real Madrid leh Sevilla inkhelh hmain Portugal captain mimal chawimawina dawn hi mipui hmuh theih turin phochhuah a ni.

Santiago Bernabeu-a inkhelah Ronaldo hian a chawimawina dawn hi a phu a ni tih a pholang nghal a, Sevilla lakah goal hnih khungin Real hi 5-0 in hnehna a chanpui–Ronaldo hian Inrinni zan inkhelh hma zawng hian La Liga-ah goal hnih bak a khung lo.

Real tan Ronaldo bakah hian Nacho, Toni Kroos leh Achraf Hakimi te chuan goal khat ṭheuh an khung bawk a, Real-in hnehna an chang chiang hle.

Kar duhawm chu

Ronaldo tan kar liam ta lo liama kar duhawm a awm chuang lo–Nilaini zan khan Borussia Dortmund 3-2 a an hnehna inkhelah goal a khung a, Champions League chanchina group stage match ruka goal khung vek thei awmchhun a ni a, match rukah hian goal kua a khung.

Kum 32 mi forward-in record a siam zo chiah a, Ningani zanah khawvela footballer ṭha ber hnena pek ṭhin Ballon d'Or chawimawina pek a ni–Ronaldo-a'n amah ang thoa footballer ropui leh a elpui Lionel Messi record a nihrual a, anni pahnih tluka Ballon d'Or chawimawina dawng hnem an awm lo.

Real manager, kum 1998-a Ballon d'Or chawimawina lo dawng tawh ve tho Zinedine Zidane-a'n inthlahrung hauh loin a player hi, "Khawvela ṭha ber a ni," tiin a sawi a, Inrinni zan La Liga hmain league match 10-ah goal hnih chiah khung mah se a pu thusawi a nemnghet nghal–Marco Asensio-a through ball ṭha tak chu goal-ah a chantir a, Jesus Navas handball vanga an penalty hmuh chu goal-ah a chantir bawk.

Real tak tak

La Liga leh Champions League thlengin Real-in beisei an phak lo a, season hmasaa Spain leh Europe champion kha an ni ta lo em ni, tih tur khawpin beisei an phak lo–Inrinni zana Sevilla an lenchilh hma hian Real chu point riat laiin an phak lo a, hnehna chang zo lo se chu table-ah pangana niin Sevilla hnuaiah an awm ang.

Mahse, Inrinni zan inkhelah Real-in champion zia an chhuah a, inkhel ṭantir aṭangin game an thunun nghal–hrem leh hliam vangin first choice centre back pahnih Sergio Ramos leh Raphael Varane te inlan thei lo mah se an hmun ruaka lut Nacho-a'n minute thumna lekah Kroos-a corner chu a khung a, vanduaina kha vanneihnaah chantirin a awm.

Ronaldo-a'n goal hniha a chhunzawm hnuah Real-in team goal an khung a, Ronaldo, Lucas Vazquez leh Kroos ten mawi zeta ball an inpek kual hnuah Germany international Kroos hian goal a khung. Minute li hnuah Ronaldo, Kroos leh Hakimi ten ball inpe kual lehin kum 19 mi defender Hakimi hian goal-ah a chantir.

Ronaldo faktu Zidane

Real Madrid coach Zinedine Zidane chuan, "Ronaldo tan chuan kar duhawm tak a ni a, hetianga a chhunzawm reng theih hi ka beisei. Ronaldo-a'n goal a la khung leh ang tih hi ka sawi fo ṭhin. Training-naa chiang taka amah hmutu ka ni a, goal a khung leh rinnaah hian ka la nghing chhin ngai lo," tiin a player a chhuang hle.

Zidane chuan sawi chhunzawmin, "Goal khung kan chhunzawm zel theih ka beisei. Match hnuhnung pahnihah goal riat ngawt kan khung a, a ropui a ni. Ka lawmna belhchhahtu chu kan goal khungna hi team ṭha an ni a, goal nga kan khung a, kan chhuah miah lo bawk," a ti.

Real Madrid hian Nilaini zanah FIFA Club World Cup-ah inelna thlengtu ram club ṭha Al Jazira an hmachhawn dawn a, UAE Pro League champion hian quarterfinala-ah AFC Champions League champion Urawa Red Diamonds an lo hneh tawh avangin hmachhawn an awlsam lo ang.

Inkhel Result
Getafe 0–0 Eibar
Real Madrid 5–0 Sevilla
Deportivo La Coruna 1–0 Leganés
Valencia 2–1 Celta de Vigo