Mariano-a'n Covid-19 a kai

Real Madrid striker Mariano Díaz chuan Covid-19 a kai tih hmuhchhuah a ni a, club chuan an player chungchangah hian thuchhuah siam nghalin a hriselna dinhmun a ṭhat thu leh dan anga a inkhung hran thu an sawi. 

Mariano hi Real league match hnuhnung bera Leganes nen an inhnehtawk ṭum khan bench-ah a ṭhu a, khelmualah luhtir a ni lo thung - Real hian Champions League last 16 second leg khel turin August 7 zan khian Manchester City an lenchilh dawn. 

European football-a thuneitu sang ber UEFA chuan Mariano chungchangah hian Real nen an inbiak reng thu an sawi a, Spanish thuneitute thutlukna leh hmalakna an ngaihchan pah thu an sawi. UEFA chuan, "Mariano-a Covid-19 kai hian Champions League match khelh hmabak an neihah nghawng a neih loh kan beisei," tiin an sawi bawk a, City leh Real inkhel tur chu a nghawng loh an beisei. City hian first leg-ah 2-1 in hnehna an chang tawh a, Santiago Bernabeu-a chak an nih avangin Madrid khaw club aiin Pep Guardiola naute hian quarterfinal lut turin chance an nei ṭha zawk. 

Mahse, February-a first leg khelh a nih hnuah Covid-19 vangin second leg khelh lawk theih a ni lo a, UEFA chuan Covid-19 vang thoa second leg hi sawn leh a ngaih an hlau a ni ber. Mariano hian tun season-ah Real Madrid tan inelna hrang hrangah match sarih chauh a khel a, goal khat a khung. Mahse, a goal khung chhun erawh March thlatira 2-0 a Barcelona an hnehna inkhela a khung a ni a, league nomawi an chawi nana goal pawimawh a ni.