Bayern Munich chakna Vidal

Inrinni zan Bundesliga inkhelah Bayern Munich chuan Arturo Vidal goal khung hmangin Eintracht Frankfurt chu 1-0 in an luhchhuah a, inkhel dangah RB Leipzig leh Mainz te chu 2-2 in an inhnehtawk thung.

German champion Bayern tan hian Chile midfielder Arturo Vidal chuan minute 20-naah Joshua Kimmich-a cross chu Frankfurt goalkeeper Lukas Hradecky dan phak lohin a tauh lut a, tun hnai a league match hnuhnung palia a goal li khungna chiah a ni.

Bayern Munich hian point 35 hmuin pahnihna Leipzig aiin point riatin an sang fal tawh a, thlasik chawlh hmain umphak theih an ni tawh lo–a vawi 23 nan Krismas laiin hmahruaitu an ni dawn.

Bayern manager Jupp Heynckes chuan, "Favang laiin hmahruaitu kan ni a, hei hi a pawimawh hle. Thlasik chawlh hun kan hman hnuah pawh a chung bera awm chhunzawm zel theih hi duhthusam a ni. Tun hnaiah ka nauten an khel ṭha em em a, European football khelh hnuah khualmuala hnehna kan chang chhunzawm thei hi a lawmawm hle a ni," tiin a sawi.

Inkhel dangah Borussia Dortmund chu an mangchhia aṭangin an la harhchhuak thei lo, an mikhual Werder Bremen lakah 2-1 in an tlawm; inelna hrang hrangah tun hnai an match hnuhnung pakuaah chak ni hmel an hmu thei tawh lo a ni.