Bengaluru tan Thuammawia a mawi nghal

Hliam vanga Indian Super League season a ṭan theih loh hnuah Mizo tlangval Lalthuammawia'n Zirtawpni zan khan Bengaluru FC tan goal a veng a, a club hlui NorthEast United lakah a team hi 1-0 a hnehna chanpuiin Emerging Player of the match-ah thlan nghal a ni.

Guwahati khawpuia inkhelah hian Bengaluru tan striker Miku chuan minute 47-naah he inkhela goal awmchhun hi a khung a, Highlanders-in an si phurh sut ngei tumin nawr ṭhin mah se Champhai tlangval Thuammawia'n a hun ṭha neiha a thiam thil 'show' loh a duh lo a, goal a chhuah duh lo.

NorthEast United tan squad-ah captain Robert Lalthlamuana hmuh tur a awm lo a, bench-ah Lalrempuia Fanai leh Lalrindika Ralte awmin Didika hi minute 64-naah tlan luhtir a ni. Bangalore club tan Thuama'n goal a ven laiin Zohmingliana Ralte chu a vawi khat nan squad-ah dah a ni a, khelmual chhungah erawh luhtir a ni lo.

Inrinni zan ISL inkhelah FC Goa chuan an mikhual Kerala Blasters chu 5-2 in an sawp bawk. Goan club tan Ferran Corominas chuan hattrick a siam a, Espanyol striker hlui hian a zawna a vawi hnih nan hattrick a siam bakah a hattrick hi minute sarih chhunga a khung a ni–ISL chanchinah hattrick siam nana minute mamawh tlem ber a ni.

Goa tan Manuel Lanzarote chuan goal hnih a khung ve bawk a, Blasters tana Mark Sifneos leh Jackichand Singh goal khungin awmzia a nei lo–Kerala club tan chanchin lawmawm lo dang a awm a, hliam vangin Dimitar Berbatov chu minute thumna lekah lakchhuah a ni. Manchester United striker hlui hi a hliam rei zawng tur a hriat loh.

Kerala tan Lalruatthara chuan inkhel bul a ṭan a, Hmunhmelṭha tlangval hian United assistant manager hlui Rene Meulensteen enkawlna hnuaia Blasters-in match li an khelh tawhah inkhel bul a la ṭan vek!

Mimal Lawmman
NorthEast United 0–1 Bengaluru FC
Swift Moment of the Match John Johnson, Bengaluru FC
Winning Pass of the Match Udanta Singh, Bengaluru FC
Fittest Player Halicharan Narzary, NorthEast United
Emerging Player Lalthuammawia Ralte, Bengaluru FC
Hero of the Match Miku, Bengaluru FC
FC Goa 5–2 Kerala Blasters
Swift Moment of the Match Ferran Corominas, FC Goa
Winning Pass of the Match Ahmed Jahouh, FC Goa
Fittest Player Jackichand Singh, Kerala Blasters
Emerging Player Brandon Fernandes, FC Goa
Hero of the Match Ferran Corominas, FC Goa