PSG an sang fal zel

Paris St-Germain chuan French Ligue 1 nomawi chawi ngei tumin chak takin hma lam an pan zel. Inrinni zan khan PSG hian an mikhual Lille chu 3-1 in an hneh a, league match 14 khelh tawhah point 44 hmuin champion lai AS Monaco aiin point kua zetin an sang fal zawk tawh a ni.

Unai Emery naute hi kar hmasa khan Strasbourg lakah an tlawm a, Champions League lama an hneh tawh hnu Bayern Munich mualah an chak lo zui bawk. Khawvel player manto ber Neymar chu chhungkaw thil vangin Brazil-ah a haw a, Barcelona forward hlui hian Lille a hmachhawn ve thei lo.

Neymar awm loh niah Kylian Mbappe a langsar hle. France rawlthar hian Angel di Maria goal khung tur a siamsak bakah goal a khung a, tun hnaia rawn vul thar leh mek Javier Pastore chuan goal khat a thawh ve bawk.

PSG manager Unai Emery chuan, "Kar laihawla inkhel ve lo ṭhenkhatten khelmual an lut a, PSG aiawh an nih tawh chuan tu pawhin theihtawp an chhuahin an khel ṭha em em vek zel. Ka nauten an tih tur an hria a, point hmu turin goal pawh kan khung. Duhthusam lohna lai awm chhun chu goal kan chhuah kha a ni, a ven dan kan zir nawn ang," tiin a sawi.

Inkhel dangah champion lai Monaco chuan PSG kal filawr lutuk tur hnaih turin Troyes lakah si an phurh zet hnuah 3-2 in an lehthal thei, hun tawp hma minute nga chiah a awm tawh tihah Monaco striker Guido Carrillo chuan goal hnih a khung a ni.