Kolkata-ah Sialhawk Express a langsar!

Indian football-ah Mizo hming a mawi zel–Inrinni zan khan I League match-ah East Bengal chuan 5-1 in an mikhual Shillong Lajong an sawp a, Sialhawk Express tia hriat lar R. Laldanmawia chuan Kolkata club tan goal hnih a khung.

Match hmasa pahniha point khat chiah hlawh thei East Bengal-in harsatna karah khaw eng an hmun ṭan a, match hnih aṭanga point ruk nei tawh Lajong tan erawh mualhphona a ni–Shillong club hian an mualpho lutuk tur thup nan goal khat erawh an khung ve tho a, an goal neihchhun hi captain Samuel Lalmuanpuia'n freekick aṭanga a khung a ni.

EB tan AFC!

Shillong Lajong phur vanglai takin East Bengal-in an zia tak tak an chhuah a, Kolkata derby chak lo hlim thinrim Meghalaya club-in an tawng bua. East Bengal coach Khalid Jamil a nih thu sawi nawn a ngai lo a, Inrinni zana Kolkata club-in hnehna an channa kawnga player langsar chu Aizawl FC lama Khalid-a'n a lo hman thiam tawh sa te an ni!

East Bengal tan hian AFC player hlui Mahmoud Al Amna chuan minute 14-naah goal hmahruai a khung a, Eduardo Ferreira-a'n a chhunzawm hnuah Aizawl FC-in I League nomawi an chawina kawnga player pawimawh R. Laldanmawia chuan goal hnih a khung zui–goal hnih khungtu Sialhawk Express hian penalty a hlawh chhuak bawk a, hattrick siam nan a pet dawn emaw tih laiin Katsumi Yusa a lo pen chhuak a, goal-ah a chantir.

Mizo tlangval

Rin loh takin Khalid Jamil hnuaia hmun pawimawh chang ṭhin Lalramchullova leh Brandon VL Remdika ten bench lamah hun hmang tluan mah se Mizo inlan awmchhun Danmawia'n a hming a chher a, goal hnih a khung bakah penalty a hlawhchhuah avangin Hero of the Match atan thlan a ni bawk.

Shillong tan ṭum dang ang bawkin captain Samuel Lalmuanpuia'n inkhel bul a

ṭan a, Zemabawk North rawlthar hian inkhel ṭantirah freekick aṭangin goal khungna chance ṭha tak a neih chu bar chungah chiah a kal a, minute 87-naa freekick hmang veka a pet luh erawh ball pet thiam bik kutchhuak a ni tih hai tur a awm lo–Shillong club tan hian F. Lalrohlua chuan inkhel bul a ṭan bawk.

Beiseina nen

East Bengal tan Danmawia'n goal hnih a khung a, Sialhawk tlangval chuan Kolkata club tana goal khung chu nuam a tih thu a sawi. Danmawia chuan, "Match hmasa pahnihah point khat chiah kan hlawh chhuak a, chi aina tur niin lang lo mah se club liana khel kan nih avangin pressure a na hle. Mahse, chak mamawh lai takin team tan goal hnih ka khung thei a, I League match khata goal hnih ka khung vawi khatna a ni bawk nen ka hlim takzet a ni," tiin a thlen chinah a lawm thu a sawi.

MPL1 best player chuan sawi chhunzawmin, "Kan team boruk pawh a ṭha leh tawh a, season ṭantir chauh a nih avangin champion sawi nan chuan la hma viau mah se nomawi chawi ngei erawh kan tum. Tun dinhmunah chuan kei pawhin kan club hi nuam ka ti a, Brandon leh Chullova ten nen Khalid-a hnuaiah player pawimawh kan nih avangin kan la hlim rih hle," a ti a, Kolkata club tan player pawimawh nih chhunzawm zel an tum thu a sawi.

Inkhel dang

Nimin I League inkhel dangah Mohun Bagan chuan 5-0 in an mikhual Churchill Brothers an sawp bawk a, Sanjoy Sen-a naute hian match thum an khelh tawhah point sarih an hlawh chhuak ta. Kolkata club tan hian Ansumana Kromah chuan goal hmahruai a khung hnuah Aser Pierrick Dipanda chuan goal hnihin a chhunzawm a, Sheikh Faiaz, leh Sony Norde te chuan goal khat ve ve an khung bawk–Bagan tan Ricky Lallawmawma chuan inkhel bul a ṭan.

Zaninah I League match khat a awm dawn a, Minerva Punjab chuan dar 8:00 hian Chennai City an mikhual ang. Minerva hian match thum an khelh tawhah point sarih nei tawhin tlawm hmel an la hmu lo a, I League hmahruaitu an ni mek. Chennai City erawhin match hnih an khelh tawhah point khat chiah an la hmu a, zaninah hnehna chan ngei an duh tawh ang.