Enga a eng mawi ber

Mizoram Tennis Association hnuaia inelna ngaihhlut ber 36th Lalzuia Open Tennis Championship 2017 chu Zirtawpni zan khan Aizawl Tennis Club-ah khelh zawh a ni a, Ramengmawia chuan Lalhmachhuana lakah 6-7, 6-1, 6-4 a hnehna changin nomawi a chawi.

Mipa singles final-ah hian Ngopa Tennis Club player pahnih an intawng a, inkhel a hmuhnawm hle. Ṭum dang ang bawkin hun pawimawh laia chefuh

ṭhin Enga'n a hunah tak a mamawh point a hmu thei a, a vawi sarih nan Lalzuia Open champion a ni–Mizoram number 1 Enga hian state pum huap inelnaah nomawi 29 zet a chawi tawh a ni.

Kum bithliah inelna lamah player beiseiawm JH Lalhruaizela chuan Malsawmtluanga hnehin Under 16 champion a ni a, kum 14 hnuailam inelna huangah Lalrinmawia chuan Zodinpuia hnehin Mizoram pum huap inelnaa a nomawi hmasa ber a chawi ve bawk.

Ramhlun naupang JH-a leh Saitual naupang Rinmawia te hian kumin February thla khan Khelo India Tennis Tournament-a Under 14 doubles-ah Mizoram tan silver medal an lo vaw chhuak tawh bawk.

December 13-17 chhung hian Oil All Assam North East Junior Tennis Championship chu Duliajian-ah khelh a ni dawn a, MTA chuan he inelna hmachhawn tur hian player pali–Robert Lalrindika (Tennis Club Zotlang), J.H Lalhruaizela (Ramhlun Tennis Club), Lalrinmawia (Saitual Tennis Club) leh Zodinpuia (Reiek Tennis Club) te a tir chhuak zui nghal dawn a, manager B. Lalruattluanga (Tuivamit Tennis Club) kaihhruaina hnuaiah vawiin tlai hian Mizoram an chhuahsan ang.