Sangkhuma Memorial Mamit Open zo fel

Mizoram Badminton Association hnuaia ranking tournament Israel Sangkhuma Memorial Mamit Open chu Inrinni khan zawh fel a ni.

MBA ranking-ah hian Mizoram hmun hrang hrang club 16 aṭangin player 80 telin men's single-ah Lalmuanawma (MPBC) chuan M. Joseph (SBC) hnehin a champion. Men's doubles-ah Muanawma leh Samuel Lalnunmawia(MPBC) te chuan Zonuntluanga leh Zothansanga (CVBC) te ṭangdun an hneh.

Mizoram Police player Muanawma hian 35+ category-ah Lalthanzuala ṭanpuiin Danny Lallawmpuia leh Lalthanliana (DTBC) te an hneh a, Thanzuala hian 45+ category-ah K. Lalramzauva (Lalat BC) ṭanpuiin R. Zonunsanga leh Zabiakthara te an hneh.

Women's single-ah F. Vanlalhriatpuii (SBC) chuan F. Lalnunzami(SBC) a hneh a, Hriati hian category dang pahnihah hnehna a chang bawk. Women's doubles-ah Hriati leh Zamzami te ṭang dunin Lalvenhimi leh Zorinkimi (IBC) te inkawp an hneh a, mixed doubles-ah Hriati hian Lalduhawma ṭanpuiin Lalbiaksanga (MPBC) leh Zorinkimi (IBC) te an hneh bawk.

Under 13-ah Lalnunsiama (MMBC) chuan Zoliansanga (MMBC) hnehin a champion a, inlena hi tluang taka zawh a ni.