Ferrari tan beisei a la sang lo

Ferrari chairman John Elkann chuan an team dinhmun a hmuh dan a sawi a, kum 2022 hma chuan champion an beisei ngam loh tur thu a sawi - team hlun tak hian insiamṭhat an tum chho mek chauh a ni.

Italian team hian tun hnaiah beisei an phak lo hle, tun season pawh a bul an ṭan fuh leh chuang lo. Harsatna hrang hrang leng karah Elkann hian team principal Mattia Binotto chungah erawh rinna pumhlum a la nghah thu a sawi bawk.

Elkann chuan, "Tunah hian hmasawn turin a lungphum kan phum vel chauh a ni a, kalphung thar a lo chhuak ang a, kum 2022 a her chhuah hunah chuan team dang nen nomawi kan inchuh phak tawh ang," a ti. Season kal laiah Ferrari car aiin Mercedes car a chak zawk, tlan chhinna an neih hoah pawh lap khat lekah pawh second khat chhung velin a phak lo ṭhin. Intlansiak pathum an neih tawh hoah pawh Mercedes an chungnung hle.

Sebastian Vettel leh Charles Leclerc inkar boruak a ṭha tawk lo a, team dang an el bakah an mahni pahnih inkarah chungnung zawk nih duhna a len em avangin thil a kal fuh thei lo - Styrian Grand Prix-ah khan Ferrari driver pahnih hi an in bakkaih a ni.