MLS Cup-ah Toronto FC an champion

USA-a football league inelna sang ber Major League Soccer champion chu Toronto FC an ni–Canadian club hian an mikhual Seattle Sounders chu MSL Cup final-ah hian 2-0 in an hneh a, Sunderland striker hlui Jozy Altidore chuan goal hmahruai khungin Barcelona player hlui Victor Vazquez chuan goal khat a thawh ve bawk.

Major League Soccer hi khawvel hmun danga football league angin kalpui a ni ve lo. Team 22 chu Eastern leh Western Conference-ah 11 ve vein an ṭhen hrang. Conference pahniha ti ṭha pathumna aṭanga parukna, team pariat chu playoff round khel turin an tling a, pakhatna leh pahnihna te chu semifinal an lut tlang thung.

Playoff-a team chakte hi Conference semifinal-ah Eastern leh Western Conference-a pakhatna leh pahnihna ten lo hmuak lehin an inkhelh zawha chak zawk ten Conference Finals an tih chu an khel–Conference final-a chak zawk ve ve hian MLS Cup hi an khel leh a, hnehna chang chu MLS champion an ni.

Toronto hian MLS Cup nomawi an chawi hma hian MLS table chung bera an awm avangin Supporters' Shield an lo chawi tawh a, Canadian Championship-ah an champion bawk–MLS club zinga domestic treble chawi thei hmasa ber an ni nghal.