Goal nga khung Tottenham Hotspur chak chiang

Premier League match li chhung hnehna an chan zawh loh hnuah Tottenham Hotspur chuan hnehna an chang ve leh ta. Inrinni zan khan Mauricio Pochettino naute hian Stoke City chu 5-1 in an sawp a, striker Harry Kane chuan goal hnih a khung.

Wembley Stadium-a inkhelah Stoke City defender Ryan Shawcross-a'n anmahni lama a tihluh palh hnuah Son Heung-min, Kane leh Christian Eriksen ten goal an khung zui. Hnehna an chan hnuah Pochettino chuan ngelnghet taka khelh zel theih chu a duhthusam a nih thu a sawi chhuak.

Tottenham manager Pochettino chuan, "Tun ṭuma kan khelh dan ang hi a ni kan mamawh chu, hetiang hian ngelnghet takin season tluana kan khel a nih chuan a sang pali zinga beiseina kan la nei," a ti. Argentine manager hian champion a sawi ri ngam lo a, a sang pali zinga tel ringawt pawh thil harsa a nih thu a sawi a ni.

Wembley ngeiah

October thla khan Tottenham hian an mikhual Liverpool 4-1 in an hneh a, hemi hnuah an khelmualah hian Premier League match ruk an khelhah vawi khat chiah hnehna an chang thei–mipui len tamna Wembley hi an hmangthiam tawk lo tih a chiang.

Stoke lakah South Korean international Son a khel ṭha hle a, goal a khung bakah Eriksen goal khung tur siamsakin Spurs goal nawrna kawnga tha thawhtu pawimawh a ni. Tottenham hian league match bikah tun season chhungin Wembley-ah goal khat aia tam vawi hnih an khungna chiah a ni.

Spurs manager Poch chuan, "Season hmasa khan European football-ah kan che chhia a, Premier League lamah kan khel ṭha thung, kan chet dan avang khan kan lawm a kim lo. Tun season-ah erawh nikum letling ang chiah kha a ni thung, tun dinhmunah chuan league chiah kan ngaihtuah rih ang," tiin a sawi.

Season hmasa Premier League-a pahnihna Tottenham hian Champions League nomawi kawltu Real Madrid chunga awm chung ngeiin last 16 an lut tawh a, knock out stage chin hi nakkuma khelh chhunzawm tur a ni–December thla chhung hian league match paruk an la khel zui dawn.

Vawi thum nan Foxes

Leicester City chuan Premier League-a vawi thum an chak zawnna ni turin kai thar Newcastle chu 3-2 in an hneh. Inrinni zan inkhelah team pahnihte an inhnehtawk mai dawna a lan laiin Foxes striker Ayoze Perez chuan an lama h a ti lut palh a ni.

St James' Park-a inkhelah Rafael Benitez-a nauten minute lina lekah Joselu hmangin goal hmahruai an khung a, mikhual tan Riyad Mahrez-a'n yard 25-a hla aṭangin a sut.

Second half-ah Foxes hian Demarai Gray hmangin hma an hruai let ve thung a, mahse Dwight Gayle hmangin an sut ve leh–minute li chiah a awm tawh tihah Shinji Okazaki-a goal khung tur a venna lamah Perez-a'n anmahni lamah ti lutin an chak loh phah.

Newcastle manager Rafael Benitez chuan, "Premier League-ah chuan holam taka tihsual neih a thiang lo. Vawi thum holam taka tihsual kan nei a, boruak sangah tawnhriat kan la neih tam tawk loh vang a ni," tiin a sawi. Newcastle hian an kum 125 tlin cham lawm nan hnehna chan tum teh mah se tun hnaia harh thar Foxes hmaah an ṭang zo lo.

Inrinni zan Inkhel Result
West Ham 1–0 Chelsea
Burnley 1–0 Watford
Crystal Palace 2–2 Bournemouth
Huddersfield 2–0 Brighton
Swansea 1–0 West Brom
Tottenham 5–1 Stoke
Newcastle 2–3 Leicester