Mustafi a chawl rei dawn Season bul a ṭan dawn lo

Arsenal defender Shkodran Mustafi chu a malpui hliam zai a ni a, season thartir lamah pawh a inlan thei dawn lo - October thla velah training a neih ṭan theih beisei chauh a ni.

Gunners hian FA Cup semifinal-ah Manchester City an hneh, he inkhelah hian German defender hian hliam a tuar. August 1 zana FA Cup final an khelh hunah pawh a inlan thei dawn lo. 2017 pawh khan damlohna vangin final a khel thei lo tawh bawk.

North London club chuan an defender chungchang sawiin, "A malpui dinglam hliam vangin Shkodran chu enkawl mek a ni, dam chiang leh tur chuan hun a mamawh deuh ang. Medical team kaihhruaina hnuaiah a dam leh thuai kan beisei," an ti.

Mustafi hian tihsual a neih fo avangin sawisel a hlawh ṭhin. Manager thar Mikel Arteta hnuaiah erawh hma a sawn a, tlarhnunga rinrawl zingah a tel; hun rei tak a chawl tur hi Gunners tan channa lian a tling.