I ti ṭha e, ka fapa Son!

A hmel en chuan, "U Mawi," ti ila, eih nulh hmel a pu a, kawngkam kuhva dawrah tui takin lo titi siam siam pawh ni se 'rinhlelh' tur hmel a pu lo. 

Khelmuala a che vel hmu ṭhin chuan a thinlung leh rilru zawng zawngin a inkhel tih an hmu ang a, inkhelh zawh apianga a chibai sem kual vel ringawt pawh chu South Korean nula rual tan chuan tawrh har tak a ni. 

Tu chanchin nge kan sawi i hria em? South Korea fapa rangkachak tih hiala an sawi 'Son Heung-min' chanchin kan sawi a nih hi - South Korea-ah chuan 'Son' aia lar zawk an awm lo an ti!

Kum 27 mi forward hi football ngaina zingah chuan a chanchin in zawh nawn a ngai tawh lo a, khelmuala a hnathawh lah hmuh theihin a ropui - mahse 'vawiin' dinhmun thleng tura a zinkawng ngaihnawm ngaithla lo erawh kan la awm nual ang.  

Son hian kum 16 mi lek a nih lai, kum 2008 khan South Korea chhuahsanin Germany a pan a, Bundesliga club Hamburg youth academy-ah football-a thiam belh ngaite zir turin puanthuah telin a inpu lut. 

Naupang hriam leh thiam bik a ni nghal a, Champions League quarterfinal-a Manchester City nen an inkhelh ṭuma target-a vawi hnih shot-a neih a khung ve ve khan a naupan laia amah enkawltu Markus von Ahlen chuan mak a lo ti miah lo!

Hamburg youth-team coach ṭhin Von Ahlen chuan, "Player che rang bik a ni a, goal a khung hnem thei em em bawk. Team tana khel ṭhin player a ni a, inzir belh a duh reng bawk a ni," a ti. 

Son hian vanneihna em em a nei - a pa Son Woong-jung chu professional footballer ṭhin tho a ni a, a hun awla Germany-a a fapa a tlawh changin club training zawh hnuah a hranpain training a neihpui leh ṭhin!

Unau zinga thuawih lo fal deuh chuan Nu ber 'chapal' thlawk in dawng fo ngei ang a, in hmunphiah vawnna lama hlap 'thip' duhzia pawh in hre bel viau ang - Mizo naupangte ang thoin Son-a thawnthu pawh a danglam bik lo. 

Son-a pa Woong-jung chuan, "Ka fate chu a chang chuan ka vaw hrep mai ṭhin a, European ho chuan an hrethiam kher lo ang," a ti - Thufing 23:13-a "Naupang thunun tim suh, Tiangin vaw mah la, a thi dâwn si lo va," tih kha a chhiar fuh ve a ni mahna!

Woong-jung hi pa danglam leh mak tak a ni ve hrim hrim. Son-te unau a training tir hian shooting leh passing-te uchuak taka zirtir a duh lo a, kum 14 an tlin hma chuan match puitling khelhtir a remti lo bawk. 

Son-a pa hian uchuak taka a fate training tir chuan an tihrawlah harsatna a thlen theiah a ngai a, training laia match khelh chuan naupangte rilru lamah harsatna a thlen thei niin a ngai bawk. 

Bundesliga club-ah inzir mah se Son hian duh pakhat a nei a, chu chu Premier League-a la inkhelh ve ngei a ni. Von Ahlen chuan, "Zingtin nui sangin min chhawn a, a rilru tak tak a sawi mai ṭhin bawk. 

"Hamburg-ah khan tawp mai a tum lo a, Premier League-a khelh ngei a duh thu a sawi ṭhin. A duhnate ti hlawhtling tur chuan talent piah lamah thawhrimna leh inpekna a ngai tel a, a tum miau avangin a hlawhtling ta a ni," a ti. 

Son hian kum 18 mi a nihin Hamburg first team tana a match hmasa ber a khel a, season thum a cham chhungin match 78-ah goal 20 a khungsak. Kum 2013 khan Bayer Leverkusen chuan a hunlaia an club player manto ber ni turin euro maktaduai 10-in an lalut. 

Leverkusen tan match 87 khela goal 29-a khung hnuah Tottenham Hotspur a pan a, London club a zawm hnua a chanchin hrilh nawn kan ngai tawh lo. Match 220-a khelhsakah goal 83 a khung tawh. 

Son hi Forbes-in kumtina Korean mi lar zinga thiltithei zual a thlan top 10-ah nikum leh kumin khan a lang ve ve a, 2019 & 2020-a Korean infiammi zinga lang kawp thei awmchhun a ni. 

Nikum khan Asian player piang tawh zinga ṭha ber ang hiala ngaih Cha Bum-kun leh Son inkara ṭha zawk hi online hmangin thlan a ni a, ESPN-in kum 2015-a Asian Footballer of All-time-a a thlan Cha Bum-kun aiin Son hi ṭha zawkah an thlang.

FIFA 20 cover-a lang tur thlannaah pawh Son hian vote a hmu hnem ber a, vote maktaduai hnih chuang tla aṭangin 16% vote a hmu a, a hnuaiah hian Neymar, Lionel Messi leh Cristiano Ronaldo-te ho an intlar!

Leverkusen tana a khelh lai khan pre-season tour neiin South Korea an tlawh a, shopping centre an kalnaah fans 30,000 velin an lo hmuak! Hetihlaia Son-a khelhpui Robbie Kruse chuan, "Rock star nena chhuak ang mai kan ni a, kan vaiin mak kan ti em em a ni," tiin Son-a larzia a sawi. 

Rio Olympic 2016 football quarterfinal-a an tlak ṭumin Son a mittui luang hmuh turin a awm a, World Cup 2018-ah a ṭap nawn. South Korea-in dan khauh tak a nei a, chu chu mipa tawh phawt, kum 18 - 28 inkar chu an ram sipaiah thla 18 tal hun an hmang tur a ni, tih a ni. 

Mahse, infiamna lama ram tana thangchhuahte hriatthiam theih dan a awm a, chumi tur chuan Son hian inelna lianthamah ram tan medal a hlawhchhuah a ngai. Asian Games 2018-ah South Korea football team-in gold an hlawh chhuak a, lawm avangin Son-a mittui a luang ta thung. 

Son hian a mittui tlak chhan hi sipaia ṭan a ngaih loh vang ni loin ram tana medal a hlawhchhuah vanga a lawmna zawk a nih thu a sawi a, Korean journalist Minhye Park chuan, "Son-a'n a vanglai taka sipai a zawm a ngai lo tur Korean mipuiin an lawmpui dan kha thilmak a tling a ni," a ti!

South Korean mipuite hian sipaia ṭan hi an ngai thutak a, ram hmangaihna lantirna chi khatah an ngai. Mahse, Park chuan, "National team tana a inhlanna leh hruaitu ṭha a nihna hian mipui thinlung a hneh tlat a ni. A pa nen interview an hmachhawn reng rengah mipui puihna avanga tun dinhmun thleng an nih thu an sawi zel a ni," tiin Son-te pafa a fak. 

Kum 27 mi a ni a, South Korean 'hero' a ni a, khawvela club lar ber pawl Tottenham Hotspur tana khelin kum khatah pound maktaduai sarih chuang a hlawh nia sawi a ni a, nupui 'chawmna' lamah harsatna a nei lo.

 

Mahse, South Korean nula hmelṭha ber ber kawpa, a duh ang taka khawvel chen thei hian a pa thu lo chuan nupui a nei ngam lo. Hmuh hnuhnun apiang hmangaiha, a remchan dan a zira hruai haw mai thei kan kat nuk lai hian Son chuan a pa thu a ngaichang tlat. 

South Korean forward chuan, "Ka pa hian inkhelh ka chawlhsan hma chu nupui neih a remti lo a, ka pawm thlap a ni. Nupui ka neih chuan football hi number 1-ah ka dah reng thei dawn lo. Top level-a rei tak khelh ka duh a, nupui nei tur chuan hun tam tak ka la nei dawn a ni," a ti.

European coach tam zawkin an player-te chu nupui nei hma turin an duh - hei hi zan lenchhuah, zu in leh party laka an him theih nana tih a ni ber. Son chuan, "Nupui nei lo chungin heng thil hi ka ti ngai chuang lo a, nupui neih phah nan a tawk lo," a ti leh mai - tlangval senior nih a tum ruh hle! 

Son hi a naupan lai chuan a unaupa nen darkar li chhung ball 'sep' turin a pain a ti ṭhin a, darkar li chhung hian ball-in lei a 'tawh' a rem lo. "Darkar li chhung hian ball ka thloh ngai lo," a ti!

Korean hnam danah chuan pa ber thu chhuak hi 'dan' ang maia zawm a ni ṭhin - Son chuan hei hi lungawi takin a pawm a, talchhuah a tum ngai lo. "Ka pa tel loin vawiin hi ka thleng dawn lo," tiin a tana a pa inpekna chu a sawi. 

Son hi footballer dang ang lo takin London khawpuiah a chhungte nen an chengho a, a hranga in dan a tum lo. Son chuan, "Engatinge a chhungte nen an la chen? tiin zawhna a awm fo. Min zawh tel tur chu vawiin dinhmun thleng tura min hrualtu hi tu nge? 

Ka chhungte hian ka tan an nun an hlan a, rulh let ka duh a ni," a ti. A nu chungchang sawiin, "A hmangaihna chu vanram ang mai a ni a, ka kawng zawh tinah a tel ve zel a ni," a ti. 

Son-a'n a ngaihhlut em em pakhat chu an ram South Korea a ni a, atana Korean mipuite inpekna chuan a thinlung a luah reng ṭhin thu a sawi. 

Spurs forward chuan, "Kan ram aiawhtu ang maiah ka inngai ṭhin. Tlai dar 3-a kan inkhelh hian Korea-ah chuan zanlai a ni a, dar 8-a kan inkhelh hian Korea-ah chuan zing dar 5 a ni. Mahse, ka inkhel en tur ringawtin an tho ṭhin a, mawhphurhna sang tak ka nei a ni," a ti.

Khelmuala nungchang mawi tak lantir ṭhintu hian a pa fuihna a hriat reng thu sawiin, "Ka pa chuan goalkeeper chauh hmachhawn ila, kan khingpui player a inhliam a nih chuan player inhliam lam chu ka pan tur a nih thu min hrilh. 'Khelmual pawn ang chiahin a chhungah pawh zahna inlantir tur a ni' a ti ṭhin," a ti.

Premier League-a player langsar ni phak Son hian an ram mipui leh a chhungte chu a dah pawimawh an ni a, a pa fuihnain a inhnuk kal ṭhin. A pa tan chuan, "I ti ṭha e, ka fapa Son," tih loh rual a ni lo e.

Bundesliga Young Player of the Hinrunde:  2010

Korean Footballer of the Year:

2013, 2014, 2017, 2019

Best Footballer in Asia:

2014, 2015, 2017, 2018, 2019

AFC Asian Cup Team of the Tournament:

2015

AFC Asian International Player of the Year:

2015, 2017, 2019

Korean Goal of the Year:

2015, 2016, 2018

The Asian Awards Outstanding 

Achievement in Sports: 2016

Bundesliga Hamburger SV All-time XI: 2018

AIPS ASIA Best Asian Male Athlete: 2018

London Player of the Year:

2018–19 Premier League

Tottenham Hotspur Player of the Season: 2018–19

Tottenham Hotspur Goal of the Decade: 2020