Man United aia thiam Man City

Pep Guardiola duh dana khel Manchester City-in Old Trafford-ah inkhel thunun chungin Jose Mourinho hnuaia khel Manchester United an kât a, 2-1 in hnehna an chang.

Premier League match 16 khelh tawh aṭangin City hian chak loh an la nei lo a, point 46 hmuin anmahni hnaih bertu United aiin point 11-in an sang tawh zawk.

Pathianni zanah minute 43-naa David Silva hmanga City hmahruaina chu Marcus Rashford hmangin first half-ah vek United-in sut mah se minute 54-naa Nicolas Otamendi-a'n mikhual tan chakna goal a khung. Pep Guardiola awm hnuah City hi, 'ṭhenawm bengchheng satliah an ni tawh lo' - Manchester khawpui a pawl.

United an mualpho

City-in Sergio Aguero aiah Gabriel Jesus an hmang a, starting eleven-ah David Silva leh Kevin De Bruyne te rawn letin Pep Guardiola-a'n inkhel thunun a tum tih a lang.

United lamin hrem vanga khel thei lo Paul Pogba aiah Ander Herrera an hmang a, Champions League-a goal khung­tu Romelu Lukaku chu Zlatan Ibra­himovic aia thlan a ni a, Rashford leh Anthony Martial ten bul an ṭan ve ve bawk avangin counter attack hman ṭangkai an tumah a ngaih theih bawk.

Inkhel an ṭan a, City player-te ball inpe kual United player-ten an thlir. Old Trafford-ah ngei City ṭantuten, "Man United ho kha bus park ru, bus park ru," tiin an au el. Goal venhim nana tlarhnung hnawh khat vek hi 'bus park' tiha sawi ṭhin a ni a, Mourinho chakna thuruk ni mah se Sir Alex Ferguson nena vul ho ṭhin United ṭantute lawm zawng a ni lo.

United ṭantuten 'nawr ru, nawr ru' tiin an player-te fuih an tum ngial a; amaherawhchu City player-ten Pep-a duh dan an bel tawh a, an hual beh hman zel avangin mualneitu lamin counter attack-na remchang pawh an nei thei lo a ni ber. Statistics lam khawihtu lar Opta awm hnua (2003-04 season) United-in Old Trafford-a ball an chan tlem ber a ni a, 35% chiah ball an chang.

Manto thlawn Lukaku?

United-in pound maktaduai 75-in Everton aṭangin Romelu Lukaku an lalut a, Belgian striker hi club lian an tumin a che ṭha meuh lo a, Manchester Derby-a a lansarh dan pawh a duhawm lo.

Kum 24 mi Lukaku hi feet ruk leh inches thuma sang a nih avangin Mourinho-a'n an khingpuiten set piece an hmuh ṭumin goal venghim turin a pawt let ṭhin a, Portuguese coach ngaihdan hi theory chuan a dik thlap. City lakah erawh Lukaku dan per sual vangin Silva-a'n goal hmahruai a khung a, Belgian striker-in a pet thiam loh lam ding lama a clear sual vangin Otamendi-a'n awlsam takin chakna goal a khung leh bawk.

Goal khung tura chanvo nei Lukaku hian a hna a tlin lo a, inrintawkna a hloh a - tihsual a ngah avangin City tlarhnung a tibuai pha lo. Belgian striker hian hun tawpa a chance ṭha neih City keeper Ederson pet per nan a hmang a, he mi per hi substitute Juan Mata-a'n pet leh nghal mah se Brazilian keeper hian ṭha takin a dang.

Danglamna penalty

Mourinho chuan an chak loh chhan chu referee thutlukna vanga nih thu a sawi!

United boss chuan, "Season liam ta ang tho a ni - football khelh dan hmang, stats, ball possession leh in duh duh rawn chhawp mah ula inkhel result danglamna chu penalty thutlukna dik loh vang a ni. Hetihlai hian referee Michael Oliver kha ka tawrhpui khawp mai, derby-ah ṭha taka inkhel kaihhruai a duh a, a tiṭha tluantling teuh hle a ni," tiin United midfielder Ander Herrera chu City defender Nicolas Otamendi lakah penalty hlawh chhuak tur a nih thu a sawi.

Manager ṭha tehna hi nomawi a nih chuan Mourinho aia hlawhtling an awm bik chuang lo mai thei; United manager hian Manchester derby-ah fak hlawh lo mah se inkhel chiktu chuan United tlarhnung a rem phui ṭhatzia an hmu ang a, point an hlawhchhuah loh chhan pawh tihsual pahnih vang chauh tih an hre thei ang.

Pep leh City an par

Season khatnaah Pep Guar­diola-a'n sawisel a hlawh a, amah­erawhchu Spanish manager hian a khelh duh dan a ringhlel ngai lo a, England-ah pawh inkhel thunun chungin hnehna a chan theih tih a rin tlat chu a dikna a lang chho zel.

Barcelona a enkawl hunlai ang maiin City ball inpe kual a mawi a, ball an chan loh laia an pressure pek dan mawlh a ropui. Anmahni hnaih bertu Manchester United an hneh avangin Premier League champion ang hiala chhaltu an tam a, Mourinho pawhin City dinhmun ṭhat thu a pha tawh lo.

Amaherawhchu, City hian khaw­vela ṭha ber nih an tum a nih chuan Raheem Sterling, Gabriel Jesus, Leroy Sane leh Sergio Aguero te goal hmaah tun aia an hriam a ṭul ang.

Guardiola chuan, "Season liam taa Old Trafford-ah kan chak pawh khan referee vanga chakah ngaih kan ni tawh. Kan ball possession hi 65% a ni a, hei hian engkim a tichiang a ni. Football khelh kan duh tih a lang. Tunah hian December chauh a la ni a, point 11-in hma hruai mah ila engmah la chiang lo. Nakkum April thlaah derby kan khel leh dawn a, chumi result chuan a la hril ang," tiin an khelh ṭhat thu leh an la champion loh thu a sawi.

City hian kartawpah Tottenham Hotspur an hmachhawn dawn a, Nilai zan hian Swansea City an hmachhawn phawt ang. United-in hemi zan vek hian Bournemouth an mikhual thung ang.