Indian football a ngaihnawm ṭan

Covid-19 vangin Indian football-in harsatna tam tak a tawk a, state league langsar tam takin tun season-a league kalpui lo turin an rel - Mizoram Premier League pawh kumina khelh loh tur zingah a tel. 

Indian Super League leh I League khelh dan turah pawh chiang taka sawi a la awm lo a, Indian football-a league sang pahnih hi season dang anga home & away-a khelh a nih erawh a rinawm loh hle. Hetiang boruak karah hian Indian Super League chu thawm nei ring ber an ni mek a, sum che vel chu tam tham tak a ni - vaibelchhe tela player lei thawm hriat tur a awm ṭan a, player 'class' a sang telh telh dawn niin a lang bawk.

 

Tun season ISL ti 'hot' zualtuah hian I League club hlun Mohun Bagan leh ATK inzawm ta chu sawi loh theih loh a ni a, Kolkata-ah an boruak a lian hle.Manchester City neitu City Football Group (CFG)-in Mumbai City-a sum an chet tir vel dante chu ngaihnawm a tling. 

Manchester City-in sum an hman nasatzia chu hrilh nawn ngai loa hretute kan ni - City neitu City Football Group chuan Indian football ṭhan nasatzia hmuin ISL lam an rawn hawi a, November 2019 khan Mumbai City-ah 65% an lei thu an puang. 

CFG hlutna hi pound tluklehdingawn 804.147-a tling a, sum hman tur an nei ang tih a chiang reng - 35% share dang hi Bollywood actor lar Ranbir Kapoor leh chartered accountant lar Bimal Parekh te ta a ni a, Ranbir-a hausakna ringawt pawh hi dollar maktaduai 45-a tling. 

Mumbai City-in sum ren lo neitu thar an neih belh a, ISL-a player hlawh zat bithliah awm chu an ngai thei lo nghal chat! ISL enkawltu Football Sports Development Ltd. hnenah hlawh hman phal chin ti bo turin an ngen! ISL-ah hian team pakhatin season khatah squad pumpui hlawh atan vaibelchhe 16.5 bak an hman phal lohna dan a awm a, City hian player hrawl leh langsar zawk lakluh an duh niin a lang. ATK-Mohun Bagan chuan City duhna hi an thlawp nia sawi a ni bawk. 

Mumbai City-in CFG hnuaia an awm hnuah transfer bazar lam an hawi a, foreign player an lei hmasak berah FC Goa aṭangin Hugo Boumous chu vaibelchhe 1.60-in an lei dawn. 

City hian nuai 160-a Boumous lei hi an remti tawh a, Indian football transfer record a ni. Kumin kum tir lam khan Japanese club Albirex Niigata chuan vaibelchhe khatin Spanish striker Pedro Manzi chu Chennai City FC aṭangin an lei a, he record hi Boumous hian a khum. 

French-Moroccan attacking midfielder hian season hmasa khan FC Goa tan league match 15-ah goal 11 khungin assist vawi 10 a nei a, ISL Golden Ball dawngin player ṭha berah thlan a ni. AFC Champions League khel tur Goa hian ATK Bagan lamah Manvir Singh chu nuai 80-in an lo hralh tawh bawk a, player transfer aṭang ringawtin vaibelchhe 2.40 an hmu tawh!

January 2020 khan ATK neitu RPSG Group chuan Indian club hlun Mohun Bagan-ah 80% share an lei tih an puang a, June 1 khan club thar hian an hming chu ATK Bagan a nih tur thu an puang zui. 

RPSG group neitu Sanjiv Goenka hi a naupan lai aṭanga Bagan ṭantu a ni a, a nihna takah chuan ATK zawk hi vui liamin a awm a ni ber - Bagan jersey rawng green & maroon an rin chhunzawm dawn a, Bagan logo ring zuiin ATK tih an chhut belh thung ang. 

Sanjiv Goenka hian dollar tluklehdingawn khat chuang pawisa a nei a, a company RPSG Group hlut zawng hi dollar tluklehdingawn 5.9 a tling - European top five league-a club neitu tam zawk aiin a hausa tihna a ni a, a ngaihtuahawm loh hle. 

ATK hian season hmasaa an player chhuanvawr, season khata nuai 400 chuang hlawhtu Roy Krishna chu an la chelh thei a, Australian forward David Williams leh Scottish Premiership club Mortherwell aṭanga an thlem luh Carl McHugh te ho an la kawl avangin an ngaihtuahawm loh ang. 

Sum ngah thar Mumbai City leh ATK Bagan-ten an team-ah neitu 'thar' an neih avangin thlir bik an hlawh a, an sum che vel a len tham bawk avangin ISL ṭan hmaa sawi bik an hlawh a nih pawhin a awm lo hran lo. Chutihrual chuan ISL club langsar zingah Bengaluru FC, Chennaiyin leh FC Goa-te hi thai bo harsa tak an ni a, Albert Roca hoa rawn inlan tur Hyderabad pawh hi en châkawm zingah an tel. 

FC Goa hian season tharah AFC Champions League chu group stage aṭanga an khelh nghal dawn avangin transfer bazar-ah an che na a nih pawhin a awm lo hran lo a, Polish football-a striker langsar Igor Angulo an lalut tawh. 

Chennaiyin thawm a reh rih a, South Indian club hian inthlak danglam an tum hle niin a lang - NorthEast United-in ram pawn player an lakluh thar sawi tur a la awm lo bawk a, Highlanders hian chanchin ngaihnawm tak an la rawn nei thei bawk.