Chelsea hmaah Huddersfield
Antonio Conte chuan Chelsea-in West Ham an hneh loh avangin Premeir League champion thei zinga an tel loh thu a sawi tawh a, zanina kai thar Huddersfield Town laka point an hloh nawn a nih chuan nomawi humhimna kawng a khirh lehzual ang.
Zanin dar 1:30 hian John Smith's Stadium-ah Terriers hian Blues hi an mikhual dawn a, Conte hote tan Huddersfield hi pal zam theih an ni dawn lo.
Huddersfield hian match li chhung an chak loh zawn hnuah kar tawp khan Brighton & Hove Albion chu 2-0 in an hneh. Manager David Wagner chuan, "Chelsea hian ngaih pawimawh ber kan nih a rinawm lo a, keini erawhin kan inkhel tur hi kan dah pawimawh hle. Pathianni aṭang khan Chelsea hmachhawn tur hian kan inpuahchah a ni," tiin an mualah Blues hneh an tum a, helai hmunah hian Manchester United pawh an hneh tawh a ni.
Terriers leh Blues hi league-ah chuan an vawi khat inkhelhna tur a ni a, an inhmachhawn hnunun ber chu kum 2008 daih tawh kha niin FA Cup-ah Chelsea-in 3-1 in an hneh a, Frank Lampard-a'n goal hnih a khung. Zaninah pawh Blues hi team ṭha zawk ni nachungin Huddersfield erawhin champion lai draw hi an pawi sa dawn lo a, Conte hote tan hna a harsat phah ang.
Chelsea boss Conte chuan, "West Ham kan hneh loh ṭumin goal attempt vawi 19 ngawt kan nei tih kan theihngilh loh a ṭha a, inrintawkna hloh tur kan ni lo. Goal hmaah tun aia kan hriam a ṭul a, thahrui nei let tura kan hahdam theih a ṭul bawk. Player zawng zawngin an hriat tur chu team kan ni a, team angin insiamṭha tur a ni," tiin Hammers hneh loh hnuah thochhuah ngei an tum thu a sawi.