Aizawla lo zin tur Churchill Brothers

December 13-ah I League champion Aizawl FC chuan tun season-a an home match hmasa berah Churchill Brothers an mikhual dawn.

RG Stadium, Mualpuia inkhel tur Goan club-in tun hnaiah beisei ang result nei lo mah se player erawh an nei ṭha a, inkhel a hmuhnawm dawn tihah rinhlelh tur a awm lo.

I League-a vawi hnih lo champion tawh Churchill Brothers hian ram pawn player langsar tak tak an kawl nual a, an player kawl zingah Precious Emuejeraye leh Peter Omoduemuke te hi inchhuanpui tham an ni. Indian player zingah Sikkimese rawlthar duhawm Uttam Rai leh Portuguese second division club Vitoria de Guimaraes tana lo khel tawh Israil Gurung te chu player langsar an ni.

Mi hlu Precious

Churchill Brothers tan tlarhnunga an ban rinawm chu Precious Emuejeraye a ni a, he player hi RG Stadium-ah en bik a sual dawn lo. Kum 32 mi centre back hi ft 6 leh in 2 zeta sang a ni a, a sanna ringawt pawh hi Aizawl FC tlarhma tan chuan buaipui tham a ni dawn tih a chiang reng.

Singapore tana vawi 61 inlan thei defender hi thisenah chuan Nigerian a ni a, kum 2002 khan S League club Jurong FC zawmin Singapore a hmelhriat ṭan. Player ṭha tak a nih avangin Singapore thuneitute chil ti puttu a ni thuai a, December 2005 khan Singapore khua leh tui nihna pek niin January 2006-ah ram tana a match hmasa ber chu friendly match-a Denmark an hmachhawn ṭumin a khel nghal a, Itimi Dickson leh Agu Casmir dawta Nigerian player Singapore tana inlan thei pathumna a ni.

Indonesian Super League club ṭha Persija Jakarta leh S League club lar Home United tan pawha lo khel tawh a nih avangin player ṭha a nih thuah inhnialna tur a awm lo a, Mulapuia AFC tlarhma dan a tum tur hi a hmuhnawm ang.

En chakawm Peter

Kum 33 mi Peter Omoduemuke hi Nigerian midfielder a ni a, Serie A club Livorno tana lo khel tawh a nih avangin a chhe thei lo. Italian third division club US Alessandria Calcio leh Serbian club ṭha FK Partizan tan pawh a lo khel tawh a, David Lalrinmuana leh Alfred Jaryan te ho nena midfield-a chungnung zawk nih an inchuh tur hi en a chakawm hle.

Nigerian midfielder hian kum 2006 khan Romanian club ṭha Politehnica Timioara-ah trial neiin contract pek a ni a, kum 2007 khan Romanian Cup-ah final a luhpui. Kum 2008 khan Romanian club vek Ceahlaul Piatra Neamt zawmin second division-ah champion nomawi a chawipui nghal a, Romanian club langsar tak CS Minerul Lupeni tan a khel bawk.

Ft 5 leh in 11-a sang midfielder hian kum 2010-a Minerul a chhuahsan hnuin Europe a hnuchhawn a, Vietnamese club ṭha Ninh Bình, Than Qu?ng Ninh leh Ðtng Nai tan a khel a, Ninh Binh tan hian kum 2013 khan Vietnamese Cup nomawi a chawipui - nomawi chawi lamah a mikhual lo hle.