Saints aia lawm zawk Arsenal

Premier League champion tum Arsenal chu Southampton khelmualah chak lo tura ngaih an nih hnuah point khat an hlawh chhuak a, Arsene Wenger-a naute tan nomawi beiseina la bo chiah lo mah se beiseina a tlem tawh khawp ang.

Pathianni zan inkhelah Saints hian minute thumna lekah Charlie Austin hmangin goal an khung a, hun tawp dawnah substitute Olivier Giroud chuan a sut hram.

France international striker Giroud hian bench aṭanga tlan lut chungin goal 17 a khung tawh a, bench aṭanga tlan lut chunga goal khung zatah Manchester United striker hlui Ole Gunnar Solskjaer nen an record a intluk - an chungah Jermain Defoe (23) chiah a awm.

Arsenal manager Wenger chuan, "Tun hnai kar hnih chhungin inkhel bul kan ṭan ṭhat loh avangin point kan hloh," a ti. Arsenal hian Manchester United lakah minute 11 chhungin goal hnih an chhuah hman a, 3-1 in an tlawm zui bawk.

Wenger chuan sawi zawmin, "Manchester United laka kan chetsualna kha kan rilruah a la awm deuh ni pawhin a lang, kan tlarhnung kha an nghet tawk lo tih chu hriat sa a ni, chutihrualin kan harsatna hi kan hneh tur a ni," tiin a sawi.

Arsenal hian an mikhual Manchester United lakah huaisen takin an bei let a, inkhel thunun chungin a tawp thlengin an bei let thei. Amaherawhchu, Southampton khelmualah chuan goal an phurh hnu pawhin tho chhuak tur awm angin an khel lo, tihsual an ngah a, an tlarhnung a nghing nawn fo bawk.

Fuh lo chu

Arsene Wenger-a'n Shkodran Mustafi a chhawr theih loh avangin rawlthar rual aiah Per Mertesacker-a'n bul a ṭan a, Germany international hlui hian beisei a phak lo - ball a pet chhuah fuh tawk loh bakah Dusan Tadic a veng hneh lo a, goal an chhuah chhan langsar a ni. Laurent Koscielny leh Nacho Monreal ten an hna an tlin tawk lo bawk.

Gunners captain hi minute 64-naah lak chhuah a ni a, Danny Welbeck leh Jack Wilshere te dahluh an ni bawk. Hun tawp dawn lama goal an mamawh laiin midfielder Aaron Ramsey chu ke na vangin a tlan thei tawh lo.

Arsenal hian substitute pathum an hman tawh avangin Welsh international Ramsey hi thlak theih a ni tawh lo a,na nei chungin khelmual chhungah a awm tluan a ngai, counter attack aṭanga hun ṭha an neihah ball pek theih a nih loh avangin an beiseina a thamral chhan lian tak a tling.