Barca chakna Messi leh Suarez
Lionel Messi leh Luis Suarez te goal hmangin Barcelona chuan Villarreal chu 2-0 in an va luhchhuah a, Catalan club hian La Liga-ah point 39 hmuin anmahni hnaih bertu Valencia aiin point kuain an sang tawh zawk.
Pathianni zan inkhelah hneh loh nei loa season hmang lai Barcelona an vannei tawk lo a, Liverpool striker hlui Suarez leh defender Gerard Pique ten woodwork tih perin darkar khat chhung chu goal an khung thei bik lo.
Minute 60-na a ni a, Villarreal midfielder Daniel Raba chu Barcelona midfielder Sergio Busquets a tihtluk avangin hnawhchhuah a ni a, hei hian inkhel a thlak danglam. Player pakhat a tam zawk Barca lamin inkhel an thunun zui a, Uruguay international Suarez leh Argentina captain Messi ten goal an khung zui.
Barcelona hian tun season league match 15 khelh tawhah vawi 12 hnehna an chang thei a, vawi thum dang chu an khingpuite nen an inhnehtawk thung–chak loh an la nei lo.
Barcelona boss Ernesto Valverde chuan, "Team ṭha tak kan hmachhawn a, kawng hrang hrangin min chhaih buai hle. Inrinni zanah kan elpui club ṭhenkhat an chak tawh tih kan hria a, chak loh a thiang lo. Inkhel harsa tak hnuaia hnehna kan chang thei hi a hlu hle a ni," tiin a sawi.
Inkhel dang
La Liga-ah Barcelona an kaltluang a, club dang erawh an inel tawk rih viau. Pathianni zan inkhel dangah Atletico Madrid chuan minute 29-naa Saul Niguez-a goal khat hmangin Real Betis chu si khat faiin an hneh.
Diego Simeone enkawl Atletico Madrid hian Champions League group stage paltlang zo lo mah se La Liga lamah erawh match 19 chhung an tlawm lo tawh a, an club record a ni. April 25 khan Villarreal chu 1-0 in an hneh lo a, hemi hnuah chak loh nei loin an kaltluang mek.
Atletico hian point 33 hmuin champion lai Real Madrid chu point hnihin an tlanpel rih a, pahnihna a awm Valencia an phak lohna chu point khat chiah a ni tawh.
Tun hnaiah Atletico hian ball an chang tlem a, Real Betis lakah pawh 26.1% chiah ball possession an nei. Argentine manager Diego Simeone chuan, "Football kan khel a, kan ti ṭha hle, a lawmawm lai chu point thum kan hmu hi a ni. Team lian leh hlauhawm kan hmachhawn ṭum ang thoin kan khelh dan phung hi chu a pangngai reng ang," tiin an naute a khelhtir dan chu sawiselna tam mah se thlak danglam a tum lo.