Norwich-in player thar an nei

Premier League mawngphah luahtu Norwich City pawhin Championship lama tlak leh mai an duh bik lo tih pholangin player thar an neih belh a, Slovakia attacking midfielder Ondrej Duda chu season tawp thleng atan loan-in an lalut. 

Kum 25 mi attacking midfielder hian season hmasa khan Bundesliga club Hertha Berlin tan league-ah match 32 khelin goal 11 a khung a, assist vawi ruk nei bawkin player ṭangkai a ni. Tun season-ah erawh December thlatir hnuah khan Berlin tan a inlan leh tawh lo a, Norwich-ah a theihna tak tak pholan leh a inbeisei ang. 

Slovakia tana vawi 35 inlan tawh attacking midfielder chuan, "Ka theihna sang ber ka hlan dawn a, chumi tur chuan match tam zawk ka khelh phawt a ngai dawn a ni," tiin a sawi.