Indian football tibuaitu Covid-19
Covid-19 vangin Indian Super League chu November 2020-a khelh ṭan turin rel a ni a, March 2021-ah khelh zawh a ni ang. Hetihrual hian season dang anga home & away-a khelh a rem dawn loh avangin hmun khata khelh a nih dan tur ngaihtuah a ni a, Kerala, Goa, West Bengal leh Northeast sawi rik a ni - entu an awm dawn lo thung. Hetiang boruak karah hian India rama state league langsar tam tak chu kalpui theih a ni dawn lo.
CFL:
India ramah chuan Calcutta Football League hian ngaihven a hlawh a, East Bengal, Mohun Bagan leh Mohammedan SC-te telna league hi khelh theih la ni lo mah se neih ngei an tum thu erawh an la sawi fan. CFL hi July-ah khelh ṭan a ni tlangpui a, kuminah erawh December vela ṭan an tinzawn chauh a ni.
GPL:
Goa Professional League tia hriat lar league hian 2019-20 season pawh an la khel zo lo a, 2020-21 chu sawi rik theih a la ni lo. GPL hi March khan Covid-19 vanga tihtawp a ngai a, inelnaah hian 90% match chu khelh a ni tawh a, an kalpui zui dan tur he thu buatsaih thleng hian a la chiang lo.
KSL:
Kerala Football Association-in an state football league chawisan nan Kerala Super League an buaipui a, mahse team pariat telna hi November-a khelh tura tih ni mah se a hun sawn a ni - khelh hun tur hi chiang taka sawi theih a la ni lo.
SPL:
Shillong khawpuia football chawi nungtu chu Shillong Premier League a ni a, mahse ngaihhlut hlawh tak SPL hi kuminah neih theih a ni dawn lo. SPL bakah hian SPL U18 leh Shillong Sports Association hnuaia league tenau zawng zawng pawh khelh theih a ni dawn lo.
MPL:
Mizoram Premier League chu kuminah khelh theih a ni dawn lo a, MPL chauh ni loin MFA Super Cup leh Independence day football tournament pawh ṭhulh a ni. MPL 2020-21 season hi khelh loh tawp tur tihna erawh a ni lo a, nakkumah khelh theih a nih leh nih loh MFA-in a ngaihtuah leh ang.
I League:
India rama league sang ber ni ṭhin I League khelh hun tur hi chiang taka sawi theih a la ni lo a, November an tin zawn chhin phawt. Hmun khata khelh vek tur niin Kolkata chu inelna thleng tura beisei an ni a, sorkar pawmpuina an neih phawt a la ngai thung - entu an awm lo ang.