Zaninah World Cup 2022 Quarterfinal ; World champion France hmaah England
Football tuipui ve deuh hlek chin chuan World Cup khel tur France leh England player hi an hre kim hial ang, khawvel huapa lar leh langsar awmkhawmna an ni a, zanin dar 12:30-a quarterfinal an khel tur hi a hmuhnawm ang.
'Kumpinu' tih hian Mizo te nen inzawmna riau a nei a, upa lam deuh lung a ti leng ngei ang. 'Feren ram kal' tih pawh Mizo nen a inzawm tlat bawk, zanina football ram ropui pahnih inkhel tur hi khawvel hmun dang ang bawkin Mizoram aṭanga entu an tam dawn.
Rambuai kuma World Cup nomawi an chawi bak chu England hian an la chawi leh lo. France erawh World Cup hnuhnung ber 2018 champion an ni thung, hlawhtlinna an in chan tharlam hleih viau.
Ram pahnih hi tun hmain vawi 31 an inhmachhawn tawh a, record nei ṭha zawk England hi vawi 17 chak tawhin ṭum kua an tlawm thung, vawi nga dang chu an inhnehtawk a ni. An intawn hnaivai ber chu 2017 June thla kha niin Paris khawpuiah France 3-2 in an chak.
World Cup bikah an intawn vawi thumna tur a ni. 1966 khan England hian group stage-ah 2-0 in an hneh a, an champion zui. 1982 khan group stage-ah bawk an intawng leh a, Three Lions hi 3-1 in an chak - a lungthu kim turin zaninah chak an tum ang.
Ven ngai bik
Kylian Mbappe a awm miau a, manager Gareth Southgate leh a naute tan chuan eng tin nge France hmatawng hi an dan ang tih chu ngaihtuah ngai a ni, ani hi an dang thei a nih chuan hna hautak ber an tlin thei tihna a ni ang.
Paris St-Germain forward hian World Cup match a khelh hnuhnung pasarihah goal emaw assist emaw a nei ziah. An ram tan major tournament match 13-ah bul a ṭan a, heng zinga pakuaah an ram hi a chak pui thei hial.
Three Lions tana hna hautak thawk tur hian Kyle Walker a rawn din a rinawm. Manchester City defender hian Mbappe dang tura a inrintawk thu tun hnai khan a sawi, an vawi khat inhmachhawnna tur a nih loh a vangin a zam bik lo.
Man City defender hian Champions League-ah Mbappe hi vawi thum a hmachhawn tawh, heng inkhelah hian Mbappe hian minute 90 chhungin shot 0.7 bak a nei thei lo, tun World Cup a khelh mek dan (6.4) nen chuan a inthlau hle.
Didier Deschamps-a'n mual vei lam sir a hmang thiam, forward Mbappe leh Theo Hernandez te awmna lam aṭang hian an goal nawr zawng zawng 41% chu a kal ṭhin, goal khung theihna vawi 26 siam chhuak tawhin assist vawi nga an neih phah - England tan ven uluk lai tur a ni.
Bellingham awmna
Jude Bellingham hi kum 19 chauh a la ni a, a kum naupan anga teh ngawt chi erawh a ni lo. Borussia Dortmund midfielder hian World Cup a hmang ṭha, a bik takin Senegal an hneh ṭuma a chet dan chuan fak a hlawh zual.
6ft 1in a sang Bellingham hi tun World Cup khelh laiah, midfielder zinga ball kang la hlawhtling hnem ber (26) a ni a, hei bakah hian khingpui ball chan lai chhuhsak hnem ber (11) a ni bawk - England tan chuan thlamuanpui tham a ni.
Declan Rice a awm avangin Bellingham hian thlamuang takin tlarhma lam a pui thei ṭhin. Ball thiam bik Phil Foden bakah Arsenal forward Bukayo Saka an nei bawk, tleirawl thaza rual vek an nih avangin midfield-a chungnung zawk nih an tum ngam ang.
France tan Bellingham leh Rice te inkawp hi huphurh tur a ni bik hran lo. Paul Pogba leh N'Golo Kante te awm loh karah Adrien Rabiot a rawn khel ṭha ṭhin. Juventus midfielder hi 6ft 2in a sang a ni a, ball kangah Bellingham nen an inbei tawk dawn.
Deschamps-a'n tawnhriat nei ṭha Antoine Griezmann a chhawr dan pawh zir chian tham a ni. Griezmann hi goal khung aiin a semtu lamah a hmang hnem zawk a, boruak sanga a thluak a fim tlat ṭhin avangin zaninah pawh a hnawksak leh khawp ang.
Striker ṭha
France tana goal khung hnem ber chu Thierry Henry a ni ṭhin, tunah erawh Arsenal legend hi Olivier Giroud-a'n a rawn khum tawh. Poland laka goal a khung khan Giroud (52 goals) a chungnung ta chiah a, a la duhtawk mai lo ang tih a rin theih.
Giroud hi ball kangah a hlauhawm, che rang leh tlan chak tak ni tawh lo mah se striker number 9 a nihna angin awmna tur hmun a thlang thiam bawk, ani ven hi Harry Maguire leh John Stones te hna a ni dawn, a awlsam lo mai thei.
England captain Kane-a'n tun tournament-ah goal khat a khung tawh a, World Cup hmasa top scorer ni thei hi khung belh chakin a tuihal mek. Three Lions tana goal khung hnem ber Wayne Rooney (53 goals) tluk turin goal khat chauh a mamawh tawh.
Kane hi striker a ni satliah lo a, a tlawh hnun nasat ṭhin avangin team tan a ṭangkai. England goal nawr tam zawk hi amah aṭanga chhuak a ni a, defender pawt khawmtu a nih bawk avangin kumin World Cup a khelh dan hi a goal khung zat aṭang chauha teh a rem lo.
Raphael Varane leh Dayot Upamecano te inkawp tura ngaih an ni a, anni pahnih inkawp hi Poland lakah an nghing zauh zauh a nih kha - Robert Lewandowski leh a ṭhiante ai chuan Kane leh a naute goal nawr hi a na zawk dawn.
Mbappe vs Walker
England leh Mbappe inhmachhawn tur a ni lo. Englandl leh France inkhel tur a ni. Mbappe kawng sialsak tur ka ni lo. - Kyle Walker, England defender
(World Cup 2022-a player langsar zinga mi chu Kylian Mbappe a ni a, PSG forward veng tura ngaih chu Kyle Walker a ni. Player ṭha pahnih inhmachhawn tur hi en a châkawm hle)
Sterling a kir dawn
Raheem Sterling chu an in an rawk avangin a chhungte thlamuan turin Qatar aṭangin a haw a, last 16-a Senegal an hneh ṭumin a inlan lo.
England FA chuan Sterling hi Qatar-ah a kir leh tur thu an tichiang a, France nen erawh hmun pawimawh a chan a rinawm loh.
Euro 2004 kha
Euro 2004-ah khan England leh France chu group khatah an awm. Three Lions-in Frank Lampard hmangin minute 38-naah an khung hmasa a, chak turah an inngai. Mahse, Zinedine Zidane-a'n minute 89-naah freekick hmangin siphurh a sut a, minute 90-naah penalty aṭangin France chakna goal a khung.
England golden generation tia an sawi team-ah khan David Beckham, Michael Owen, Paul Scholes, Frank Lampard, Steven Gerrard, Wayne Rooney bakah player ṭha dang awm mah se nomawi an chawi lo.
World Cup Last 16
Quarterfinal Fixtures
Nizan Inkhel - Result kan hre hman lo
Croatia 08:30 PM Brazil
Netherlands 12:30 AM Argentina
December 10, Inrinni Zan
Morocco 08:30 PM Portugal
England 12:30 AM France