Morocco vs Portugal - Portugal boruak a ṭha lo!

World Cup last 16-ah meuh 6-1 in an khingpui Switzerland an sawp thei a, boruak ṭha tak hnuaia awm awm tak an nih laiin Portugal team boruak a ṭha lo - an ti!

Mahse, zaninah Portugal-in World Cup quarterfinal an khelh a ṭul a, zan dar 8:30-ah Morocco nen semifinal luh inchuhin an inkhel dawn.

Morocco hian rin hlawh zawk Spain chu last 16-ah penalty hmangin an hneh a, La Roja hneh thei team hian Portugal hi an hlau dawn lo - Portugal tan hetiang kara boruak ṭha lo, lo neih hi a hun lo hle.

Portugal boruak ṭhat loh chhan ber hi Cristiano Ronaldo lungawi loh vang niin khawthlang media-ten an tarlang a, mahse, Portuguese Football Federation (FPF) chuan harsatna an neih loh thu an sawi tawh.

Tak tak maw?
Portuguese publication Record chuan Switzerland laka bul a ṭan loh tur thu hrilh a nih khan, Ronaldo hian Portugal squad chhuahsan maiah coaching team lam a vau niin an ziak.

Mahse, FPF an lo lang vat a, "Qatar-a a awm chhungin Cristiano Ronaldo hian engtiklai mahin ram team chhuahsanah midang a vau lo," an ti a, ram leh hnam tana a hnathawh avangin Ronaldo chuan zah a phu thu an tarlang bawk.

Ronaldo hi group stage match tawp bera South Korea an ngam loh ṭumin lakchhuah a ni a, na taka Manchester United a sawisel avanga a contract tihtawpsak forward hian a lungawi lohna a lantir hial.

Portugal coach Fernando Santos chuan Ronaldo chet dan chu ṭha a tih loh thu a sawi zui a, Switzerland lakah bul a ṭantir lo zui - Ronaldo-a'n boruak a nei zui hi a awm lo hran lo.

Beiseina
Portuguese Football Federation-in Ronaldo an chhan a, mahse, ram khat football thuneitu sang berin thuchhuah an siam a ṭul tawh chuan 'engemaw' chu a awm ngei niin a lang - Ronaldo a ṭawng chhuak ve zui.

Manchester United nena inṭhen hlim Ronaldo chuan, "Pawn lam thilin a kehchhiat tir atan chuan kan inhnaih mah mah a, pawn lam buainain a tihbuai atan chuan kan huaisen mah mah a ni.

"A tawp thlengin he team hian kan bei dawn a, kan beiseina hi min ṭawmpui turin ka sawm a che u," a ti a, pawn lam boruak thuthangin an team a tihbuai loh tur thu a sawi.

Mahse, zanina an hmachhawn tur Morocco hi chuti maia awlsama hneh theih tur chu an ni dawn bik lo - Portugal team boruak a ṭha tak tak em? tih chhanna pe theitu chu anmahni chauh an ni a, zaninah a hriat ang.

Ronaldo tel lohna
Cristiano tihtauh thuin media titi luah viau mah se, Switzerland lakah Ronaldo tel lo pawha Portugal ṭhat tawkzia hmuh turin a awm - zaninah pawh bul a ṭan a rinawm lo.

Portugal boss Fernando Santos chuan, "Ronaldo hi a inkhel ngei ang. Bench-a awm zawng zawng player hi hman theih vek an ni a, bul an ṭan lo a nih pawhin a hnuah an khel thei tho alawm," a ti - a sawi dan hmangin bul ṭantir a tum lo niin a lang.

Santos chuan sawi zawmin, "A sulhnu hi kan thlirsak fo a ṭul. Khawvela footballer ṭha ber pawl a ni a, captain a ni a, team pumpui anga ngaihtuahna sen a ṭul a ni," a ti a, mi pakhat chauh ngaihtuah thei an nih loh thu a sawi.

Ronaldo 'hlau' ang hiala sawi ṭhin Santos-a'n Switzerland lakah thutawp siamtu a ni tih a pholang a, Morocco lakah thutlukna huaisen siam nawn a ṭul a nih pawhin a tim lo ang.

Tu nge inlan ang?
Kum 37 mi a ni ve tawh miau a, an ram team-ah lehzel pawh Ronaldo a hnawng ṭan hi thil awm lo a ni hran lo - Switzerland lakah a aia lut Goncalo Ramos-a'n hattrick a la siam zui!

Zaninah pawh Ramos hi a inlan leh a nih chuan Santos-a'n 4-3-3 formation a rawn hmang leh ngeiin a rinawm a, Bruno Fernandes, Ramos leh Joao Felix te nen tlarhmaah an inkawp dawn tihna a ni a, Morocco tlarhnung tan a awlsam lo ang.

Midfield-ah Bernardo Silva, Otávio leh William Carvalho te inkawp leh tura ngaih an ni a, hming langsar ber Silva-a'n a mawhphurhna a hlen ṭhin a, Real Betis midfielder Carvalho leh FC Porto winger Otávio te pawh an che chhe ngai lo.

Tlarhnungah kum 39 mi Pepe-a'n a la ho thei a, a dinpuite hi Manchester City rinrawl Ruben Dias, Manchester United right back Diogo Dalot leh Borussia Dortmund left back Raphaël Guerreiro te an ni a, si ban nghaktu Porto keeper Diogo Costa a nih bawk avangin an ngaihtuahawm lo hle.

Morocco thlirna
Ronaldo-a'n hman angin a la hlu reng emaw a ti a, a lungawi lohna a lantir chiah khan Portugal-in a tel lo pawhin an buai lo tih an pholang ve nghal a, champion tur khawp squad an nei tih an pholang.

Portugal nena khaikhin a ralah Morocco hi team nem zawk niin lang mah se Portugal barakhaih tur khawp squad chu an nei - Sevilla keeper Yassine Bounou hi Spain laka penalty vawi hnih dangtu a ni a, ngaihthah a thiang lo.

Paris Saint-Germain right back Achraf Hakimi leh Bayern Munich full back Noussair Mazraoui te chu tlarhnung an ven tluk zekin, counter attack-a an nawr let hun atana Morocco player pawimawh tur an ni - West Ham centre back Nayef Aguerd leh Besiktas defender Romain Saiss ten an dinpui bawk ang.

Midfield-ah Standard Liege midfielder Selim Amallah, Fiorentina player Sofyan Amrabat leh Ligue 1 club Angers player Azzedine Ounahi ten bul an ṭan leh a rinawm a, Portugal laka hnehna chang turin tlarhmaa Hakim Ziyech, Sevilla striker Youssef En-Nesyri leh Angers forward Sofiane Boufal te an chawm ṭhat a ṭul dawn.