England dah sangtu Deschamps

France coach Didier Deschamps chuan nimin tlai khan media a hmachhawn a, zanina World Cup quarterfinal-a an hmachhawn tur England chu team ṭha tak an ni tih a sawi a, a naute chu fimkhur turin a chah tih a sawi bawk.

Les Bleus coach Deschamps chuan, "England hian player an nei ṭha, an match hmasa lamah pawh goal an khung hnem, a bik takin counter attack chu an hlauhawmna a ni, player tlan chak tak tak an kawl hnem.

"Team hrang hrang hian ṭhatna leh ṭhat lohna lai an nei vek an ṭhin, kan khingpui tur England erawhin ṭhat lohna lai an nei lo," tiin Three Lions chu a dah sang thiam hle, a rilru tak tak a sawi em tih erawh hriat a ni lo.

World Cup khelh laiah Kylian Mbappe-a'n goal nga a khung tawh a, ani aia khung hnem an awm lo. Zaninah pawh ani hi England tlarhnung tana ven ngun ngai bik a ni dawn.

A forward chungchang sawiin Deschamps chuan, "Kylian hmachhawn turin England an inbuatsaih ngei ka ring, ani chauh ni lo pawh player ṭha dang kan nei tih erawh ka sawi duh. Chu tih rualin Kylian hi chu a danglam a, uluk taka an ven karah pawh danglamna a siam ṭhin," a ti.

World Cup hmasa khan Deschamps hian an ram a champion pui, player a nih laiin France tan World Cup nomawi a lo chawi tawh bawk - Les Bleus tana a suhnu hnutchhiah hi a turu hle.

Qatar World Cup zawh hian a contract neih lai a tawp dawn. Zawhna chhangin Deschamps chuan, "Tun dinhmunah chuan engtin nge semifinal kan luh theih ang tih bak ka ngaihtuah lo," a ti.