Jesus lo kir hun tur a hriat loh - Arteta

Arsenal manager Mikel Arteta chuan Gabriel Jesus hliam dam hun tur a chiang lo tih a sawi a, eng tik hunah nge a lo kir hun tur a hriat loh avangin a hmun ruak luah thei tur an melh tih pawh a pha lo.

Jesus hi Brazil tana World Cup a khelhnaah a khup a hliam, a kup dinglam na hi hlawhtling taka zai niin tunah an enkawl mek - khawtlang media ṭhenkhat tarlan dan chuan tun season chhungin a lo kir thei tawh lo mai thei.

Gunners manager Arteta chuan, "Tunah chuan hun bituk engmah kan la nei thei lo. Chiang taka kan sawi theih awmchhun chu a khup hliam enkawl mek a ni a, nitin a dinhmun endik reng a ngai, dam fel tur chuan hun a mamawh rei dawn.

"Thlasik bazarah striker kan melh dawn leh dawn loh zawhna kan dawng hnem, kan team ti chak thei tur leh kan mamawh tak kan hmu a nih chuan kan ngaihtuah ang, thutlukna kan siam sual loh ka beisei," tiin a sawi.

Arsenal hi Premier League hmahruaitu an ni mek, champion lai leh anmahni hnaih bertu ni bawk Manchester City aiin point ngain an sang mek, a chung bera an awm theih nan hian Jesus hi player thawh hlawk bik zinga mi a ni phak.

Jesus a awm loh chuan North London club hian Eddie Nketiah chu rinrawla an hman a ngai dawn. Hale End chhuak Nketiah hi player ṭha pangngai tak chu a ni, mahse Premier League champion pui tur chu a harsa deuh mai thei.

Arteta chuan, "Ka squad neihah hian ka lawm, chutih rualin hliam kan nei erawh a pawi ka ti. Player-te thawhhona a ṭha a, a bik takin academy aṭanga inzir chhuak chhawr tur dang pawh kan la nei, hengte hian ngelnghet taka an khelh theih nan kan pui ang," a ti.

Arsenal hian Premier League season an hman chhunzawm tur inbuatsaih nan Ningani zan khan Lyon an hmachhawn. Al-Maktoum Stadium, Dubai-a inkhelah Gunners tan Gabriel, Nketiah leh Fabio Viera ten goal khat ṭheuh khungin 3-0 in an chak.