African beiseina siamtu Walid Regragui

World Cup 2022 quarterfinal lut team coach langsar tak tak zingah hming langsar lo tak pakhat a awm ve a, a hming chu Walid Regragui a ni - kum 47 mi coach hian an ram team a kaihhruai hmasak berah World Cup a tlinpui a ni satliah lo a, World Cup quarterfinal a hruai thleng!

African coach zinga World Cup quarterfinal-a a team hruai thleng hmasa bertu hian August 2022 khan Morocco hi enkawl ṭan ve chauh a, player a nih laiin ram tan match 45 a khel hman.

Morocco club Fath Union Sport aṭanga a coaching career ṭanin, 2014-20 season inkar kha a enkawl a, Botala-ah (an ram league sang ber) 2015-16 season khan champion puiin, Moroccan Throne Cup (2013-14) ah a champion pui bawk.

January 2020 khan Qatari club Al-Duhail zawmin, season khat chiah cham mah se Qatar Stars League-ah a champion pui a, August 2021 khan an ram club Wydad AC enkawl hna a ṭan.

Wydad AC-ah hian season khat chiah a cham chungin an ram league leh CAF Champions League-ah nomawi a chawipui a, World Cup-ah Morocco tan hna ropui a thawk leh ta - European football-ah kan hmu thuai a nih pawhin a mak lo ang.