FIFA World Cup 2022 Quarterfinal khel tur zingah tu nge bench nei ṭha ber?

FIFA World Cup 2022 quarterfinal chu nizan khan khelh ṭan a ni tawh a, zaninah match hnih dang khelh a ni ang. Nizan khan Croatia vs Brazil bakah Netherlands vs Argentina te an inkhel a, inkhel en châkawm bik tia sawi theih ve ve a ni

Zanin dar 8:30-ah Morocco leh Portugal te an inkhel dawn a, chak tur chu chiang lo mah se quarterfinal-a ngaihven hlawh lo ber a ni thei ang. Zan lai dar 12:30-a inkhel tur England leh France erawh Mizo mipuite ngaihven ber a ni hial ang.

England
First eleven lut ngun (4-3-3): Pickford; Shaw, Maguire, Stones, Trippier; Rice, Bellingham, Mount; Saka, Kane, Sterling

Gareth Southgate-a'n World Cup group match hmasa berah starting XI-a hman ngun ber hi a rawn hmang a, Iran an sawp. Three Lions hi tun World Cup-a bench nei ṭha ber tira sawi theih an ni hial ang.

Jordan Pickford, Luke Shaw, Harry Maguire, John Stones, Declan Rice, Jude Bellingham, Bukayo Saka leh Harry Kane ten hmun pawimawh an chang. Bellingham tih loh player dang hi chu Euro 2020-ah pawh khan hmun pawimawh an chang vek.

Quarterfinal an thlen meuh chuan Kyle Walker leh Kalvin Phillips te an dam tawh a, anni pawh rinrawl an ni ṭhin. Amaherawhchu Senegal an hneh ṭumin Jordan Henderson a khel ṭha a, Kalvin Phillips tan khelh phak a harsa ang.

Southgate-a'n bench aṭanga lut tura a rin ber chu Jack Grealish tiin a sawi theih a, stage a san zel avangin English manager hian tlarhnung rem phui a ngai pawimawh ang.

France
First eleven lut ngun (4-2-3-1): Lloris (GK); Hernandez, Varane, Upamecano, Kounde; Rabiot, Tchouameni, Griezmann; Mbappe, Giroud, Dembele

Didier Deschamps pawhin bench a khingpui tur Southgate ang thoin bench a nei chhah. Chutihrualin World Cup ṭan hmaa player pawimawh Karim Benzema, Christopher Nkunku, Paul Pogba leh N’Golo Kante te an inhliam avangin an squad chhah tur angin a chhah lo zawk.

Benzema awm lo mah se Deschamps hian Olivier Giroud a nei a, AC Milan striker Giroud hi a pawimawh hle. France-in goal an nawr dawna awm hmasa ber chu Giroud a ni a, Arsenal leh Chelsea striker hlui hi Kylian Mbappe leh Ousmane Dembele ten an thlawp.

Kante leh Pogba hmunruak hi Aurelien Tchouameni leh Adrien Rabiot ten an hnawh khat a, player talent nei ṭha pahnih hian player hming langsar pahnih ai an awh zo rih hle.

Chutihrualin Les Bleus hian Tunisia an hmachhawn ṭumin player inlan tlem zawk te an khelhtir a, an chak lo. Hemi a nih avang hian Deschamps-a'n a player rin ṭhante ho bawk hi a rin chhunzawm zel a rinawm.

Morocco
First eleven lut ngun (4-3-3): Bounou; Mazraoui, Saiss, Aguerd, Hakimi; Amrabat, Amallah, Ounahi; Boufal, En-Nesyri, Ziyech

Walid Regragui hi African coach zinga World Cup quarterfinal thleng hmasa ber a ni a, a sang pariata inhlangkai tur hian Spain an hneh.

Morocco ṭhatna tak chu player rin ngai an ring chho zel hi a ni a, match li an khelh tawhah player pakuain bul an la ṭan ziah.

Spain an hneh ṭumin defender Nayef Aguerd a inhliam a, Portugal nen a dam hman rinawm zawk mah se a khel lo a nih chuan a hmunruak hnawh khah hi a harsa ang.

Morocco hian goal venghim turin an inrem phui ṭha a, counter attack aṭanga nawr turin wing back Noussair Mazraoui leh Achraf Hakimi te an neih avangin team zuam sual theih tak an ni.

World Cup ṭan hma khan Morocco hi mi ṭhahnem zawk chuan group stage paltlang lo turah an ngai a, mahse tunah chuan quarterfinal hial an thleng.

Portugal
Last 16-a bul ṭantu (4-3-3): Costa; Dalot, Pepe, Dias, Guerreiro; Carvalho, Otavio, Bernardo; Fernandes, Felix, Ramos

Argentina leh Brazil ang thoin last 16 thleng khan Portugal-in first eleven ngai an hmang lo. Switzerland an sawp ṭumin superstar Cristiano Ronaldo pawh bench-ah dah a ni a, Fernando Santos hian Ronaldo chauh ni loin Joao Cancelo leh Ruben Neves te pawh bench-ah a dah.

Santos hian squad a nei chhah ṭha a, Ronaldo bench-a dahtir ngam avangin player thlak kual tur pawh a nei ṭha. Chumi awmzia chu Portugal coach hian Plan A chauh ni loin Plan B pawh a nei ṭha a, khingpuite tan pawh an khelh dan tur hriatthiam a har ang.

Portugal forward Goncalo Ramos chuan knockout stage-ah bul ṭanin hattrick a siam a, Raphael Leao pawh bench aṭanga la lut vekin goal hnih a khung. Kum 23 mi Leao hi AC Milan tan a khel mek a, tun season Serie A-ah match 14 aṭangin goal ruk a khung tawh a ni.