Khawiah nge Mizo player-te?

Indian football sawi chuan rilruah Mizoram player-te an lo lang lo thei lo a, a bik takin Indian football-a thawm nei na Jeje Lalpekhlua kalna tur lamin ngaihven a hlawh hle.

Jeje hian season hmasa kha hliam vangin a khel lo a, Chennaiyin FC lamah a contract a zo bawk. South Indian club hian an striker chhuanvawr hi chelh duh mah se Jeje-a'n thutlukna a la siam lo a, club dang nen pawh indawrna a kalpui reng. 

The Mizo Sniper tia hming lem an pek striker chuan, "Club panga nen indawrna kan kalpui mek a, tunah chuan thutlukna siam theih a la ni lo," tiin Vanglaini a hrilh. ISL-a la inlan ngai lo player zingah Lalkhawpuimawia'n NorthEast United a zawm a; Aizawl FC-a hming a chher hnuin Rochharzela pawhin Highlanders hi a zawm bawk. 

Odisha FC-in Mizo talent ṭhatzia hriain Aizawl FC lam an hawi a, Bawngkawn rawlthar Isak Vanlalruatfela leh Kolasib tlangval Paul Ramfangzauva te an lalut - ISL-a an season hmasa ber an hman dawn avangin an tan 'chona' a ni. 

Shillong Lajong academy aṭanga inzirchhuak Joe Zoherliana chuan Bengaluru FC lam panin a puanthuah a tel bawk a, season hmasa MPL champion Aizawl FC-a Mizo player pali chu ISL-ah an khel dawn tihna a ni.