NorthEast coach thar Vincenzo Annese

Indian Super L eague club NorthEast United FC chuan tun season match riat an khelh tawha an tlawm vek hnuin coach Marco Balbul an ban a, Italian coach Vincenzo Alberto Annese an lalut.

Israeli coach Balbul hian season ṭan dawn khan beiseina sang tak nen Highlander enkawl hna a ṭan a, mahse, Maccabi Haifa coach hlui hian match riat a enkawlah hnehna a chanpui miah lo - an tlawm fai vek a, red card vawi hnih a hmu thung!

NorthEast-in Balbul an ban a, Vincenzo Annese an lalut zui a, Italian coach hi Indian football-ah a mikhual lo hle - I League club Gokulam Kerala a lo enkawl tawh a, 2020-21 leh 2021-22 ah league nomawi chawipuiin, a zawnin a champion pui a, a zawna I League champion thei club hmasa ber an ni.

Italy, Estonia, Ghana, Indonesia, Latvia, Palestine leh Kosovo thlenga coach hna lo chelh tawh Vincenzo hian AFC Cup thlengin Gokulam hi a kaihruai a, mahse, group stageah tlakpuiin June 2022 khan South Indian club nen hian an inṭhen. Club dang a enkawl loh reng hnuah NorthEast United nen an intawng a, Highlander-in a kaihhruaina hnuaiah result ṭha an neih theih an beisei ang - zanin dar 7:30-ah Chennaiyin anmikhual zui dawn.

NorthEast United-ah hian Mizo defender Joe Zoherliana, midfi elder Emanuel Lalchhanchhuaha, forward Laldanmawia Ralte leh Rochharzela te an awm a, coach thar Vincenzo hnuaiah hmun an chang phak dawn em, tih chu hunin a hril ang.